Banorët e Shkupit sot nga ora 12:00 protestojnë para Qeverisë së Republikës së Maqedonisë për të shfaqur pakënaqësinë e tyre për ndotjen e lartë të ajrit, që ditëve të fundit mban vendet e para edhe në rang botëror për nga niveli i ndotjes së ajrit.
“Protesta nuk është e organizuar nga parti politike, është e organizuar nga qytetar, prej të gjithë neve që thithim ajër të ndotur”, thonë organizatorët e protestës nën moton “Ngrituni për ajër të pastër”.
Aktivistët kundër ndotjes së ambientit jetësor, gjithashtu ftojnë prindërit që të mos i lëshojnë fëmijët të shkojnë në shkollë më 20 dhjetor (e mërkurë) në shenjë proteste ndaj ndotjes së ajrit. Kryetari i Qytetit të Shkupit, Petre Shilegov, për këtë nismë tha se është e “motivuar politikisht”.
