Një bashkudhëtar ka ndërruar jetë, një është lënduar rëndë dhe 14 më lehtë, në gjithsej 15 aksidente që kanë ndodhur gjatë fundjavës së kaluar në rajonin e Shkupit.
Sipas njoftimit të SPB Shkup, fundjavën e kaluar ka pasur gjithsej 29 aksidente prej të cilave 14 kanë qenë me dëme materiale.
“Gjithsej 167 shoferë kanë drejtuar veturën e tyre më shpejtë se sa është e lejuar, ndërsa nga komunikacioni janë larguar 67 shoferë të cilët kishin drejtuar veturën nën ndikimin e alkoolit, 57 para se të pajisen me patentë shoferi dhe 17 shoferë fillestarë”, thonë nga MPB.
Nga komunikacioni janë larguar gjashtë vetura me dëmtime teknike dhe 53 të paregjistruara.
Policia e trafikut ka dhënë 269 dënime për parkim të palejuar, ndërsa 128 automjete janë marr nga automjeti special “karrotreci”.
