Prej dy vitesh, ish-naftëtari nga Marinza Irakli Gjata nuk regjistron dot tokën e tij në Zyrën e Regjistrimit të Pasurive të Paluajtshme në Fier.
“Janë 4 dynym tokë këtu në këtë parcelë, tokë të cilën e kam marrë në vitin 1991 kur janë ndarë tokat. E kam shfrytëzuar me grurë, misër, jonxhë, fasule etj.. Toka ime kufizohet nga 3 puse. E kanë shënuar gabim sikur toka ndodhet në kodër”, thotë ish-naftëtari.
Toka ndodhet në zonën naftëmbajtëse të Marinzës dhe shfrytëzohet nga kompania “Bankers Petroleum”. Por, Irakliu nuk mund të marrë as paratë e dëmshpërblimit, për tubacionin që kalon në tokën e tij.
“E ndërtuan tubacionin, por nuk më dhanë dëmshpërblim, për arsye se thanë që donin një firmë nga kryetari i bashkisë. Kryebashkiaku më thotë se, pasi e ka verifikuar që toka është imja, nuk e firmos dot sepse ka një gabim. Ose ka njeri tjetër mbi mua, që e ka marrë tokën dhe nuk tregon njeri, ose ma kanë dhënë tokën gabimisht. Unë s’e kam dashur tokën këtu, harxhova lek për këtë”, tha Irakli Gjata.
I lodhur nga dokumentet zyrtare dhe endjet pa fund në zyra, ish-naftëtari kërkon një mundësi që të rikthehet të shfrytëzojë tokën e tij.
