36 mijë biznese të vogla nuk kanë llogari bankare - Bota Sot
36 mijë biznese të vogla nuk kanë llogari bankare

Shqipëria

36 mijë biznese të vogla nuk kanë llogari bankare

Më: 9 shkurt 2019 Në ora: 09:34
Foto

Konkluzioni ka dalë nga raporti i Bankës Botërore, por kjo është edhe një nga arsyet që Ministria e Financave të ndryshojë ligjin e procedurave tatimore, që detyron biznesin të hapë një llogari bankare. Drejtori i Politikave Fiskale në Ministrinë e Financave, Niko Lera, deklaroi dje se synimi i këtij projektligji është të reduktojë qarkullimin e parasë cash dhe të parandalojë pastrimin e parave.

“Sipas të dhënave të Bankës Botërore rezulton se 40 për qind e tatimpaguesve të xhiros nga 0 deri në 8 milionë, pra te biznesi i vogël, nuk kanë llogari bankare. Ne kemi propozuar që të gjithë tatimpaguesit, persona juridikë dhe kompanitë, duhet të çelin llogari bankare dhe kjo nuk ka kosto taksash për buxhetin e shtetit, ndërkohë që për tatimpaguesit që janë persona fizikë, biznes i vogël, u vendos një limit ku u përjashtuan nga hapja e llogarisë bankare tatimpaguesit me xhiro nga 0 deri në 2 milionë lekë në vit. Kjo fashë përbën edhe pjesën më të madhe të tregtarëve me pakicë, ambulantëve, bizneseve të vogla në mënyrë që të mos iu krijohen kosto shtesë.

Gjithashtu, fluksi më i madh i transaksioneve kryhet nga biznesi me qarkullim xhiroje mbi 2 milionë lekë në vit, të cilët janë tregtarët me shumicë, importuesit etj.. Drafti parashikon edhe penalitete për ato biznese që nuk do të hapin një llogari bankare”, u shpreh Lera. Drejtori i Politikave Fiskale thotë se 60 mijë tatimpagues do të përjashtohen nga detyrimi për hapjen e llogarisë bankare, ku përfshihen tregtarët e vegjël dhe ambulantët.

“Nga 110 mijë tatimpagues që operojnë në vend, kanë të drejtë të hapin një llogari bankare apo disa, të cilat i shërbejnë veprimtarisë së tyre. Në projektligj përcaktohet që bizneset që kanë qarkullim xhiro mbi 2 milionë lekë, kanë detyrimin të kenë të hapur një llogari bankare. Të përjashtuar janë vetëm personat fizikë me qarkullim 0 deri në 2 milionë lekë, që janë 60 mijë biznese, të cilat nuk janë të detyruar të kenë llogari bankare”, u shpreh Lera.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...