Gratë dhe vajzat në shkencë kanë tanimë ditën e tyre ndërkombëtare në të cilat motivohen dhe nxiten për studime drejt shkencës. Doktorja e Shkencave Mimoza Hafizi thotë se statistikat për gratë në shkencë janë duke ndryshuar për mirë.
Për të katërtin vit radhazi, në mbarë botën 11 shkurti shënohet si Dita Ndërkombëtare e grave dhe vajzave në shkencë.
Në kuadër të kësaj dite, Fondacioni Henrieta Leavit në bashkëpunim me Fakultetin e Shkencave të Natyrës organizuan një takim për nxitjen e vajzave të reja drejt studimeve në shkencë.
Për doktoren e Shkencave, Mimoza Hafizi, të tilla aktivitete janë të domosdoshme dhe motivuese.
Mimoza Hafizi: Gratë karakterizohen nga përkushtimi por edhe serioziteti, korrektesa por edhe finesa e tyre i jep nuanca shumë me vlerë kërkimit shkencor.
Sipas Hafizit, statistikat për gratë në shkencë janë duke ndryshuar për mirë.
Mimoza Hafizi: Numrat janë rritës. Ka Departamente në Fakultete që numri është i barabartë midis burrave dhe grave. Besoj që ky numër po shkon në sensin pozitiv. Duhet frymëzuar jo vetëm numri i grave por edhe numri i njerëzve që duan shkencën. Kjo vjen me një sistem të mirëorganizuar arsimor.
Sot në botë vetëm 28% e të gjithë kërkuesve shkencorë janë femra, edhe pse mund të ketë edhe përjashtime si rasti i Bolivisë ku ka më shumë shkencëtare femra sesa meshkuj, specifikisht 63% femra dhe 37% meshkuj.