Koronarografia, një procedurë invazive, që konsiston në kontrollin e arterieve koronare u realizua për herë të parë në spitalin rajonal të Fierit.
Kirurgu Ndriçim Kallashi kreu këtë procedurë që konsiston në kontrollin e arterieve koronare, të cilat janë përgjegjëse për furnizimin e zemrës me gjak.
Tashmë banorët e Fierit nuk do të shkojnë më në Tiranë për të realizuar këtë ndërhyrje jetë shpëtuese.
Gjashtë muaj më parë kryeministri Edi Rama dhe Ministrja e Shëndetësisë dhe Mirëqenies Sociale, Ogerta Manastirliu premtuan mbështetje për spitalin e Fierit për ta shndërruar atë në një spital rajonal, i cili të ofrojë shërbime të reja në fushën e kirurgjisë dhe shërbime të tjera.
Kjo mbështetje dha frutet e saj të dukshme dhe tani e në vazhdim, Koronarografia do të kryhet edhe në spitalin rajonal të Fierit.
Rreth 163 mijë pacientë janë përfitues të drejtpërdrejtë të investimit të qeverisë për transformimin e spitalit rajonal të Fierit. Po ashtu spitali rajonal i Fierit mbulon gjithë urgjencat kardiake të rajonit jugor të vendit, falë investimeve në laboratorin e ri të hemodinamikës.
