Asnjë kandidat nuk është paraqitur në zgjedhjet për Bordin e Administrimit të Universitetit të Tiranës. Procesi ka dështuar duke lenë kështu pa anëtar studentët në këtë bord dhe duke anuluar edhe zgjedhjet që do të mbaheshin më 25 shkurt.
Procesi i zgjedhjes së anëtarit të Bordit të Administrimit nga ana e studentëve ka dështuar në Universitetin e Tiranës.
Afati i dorëzimit të kandidaturave ka përfunduar në 11 shkurt por burimet bëjnë me dije për Ora News se nuk është paraqitur asnjë emër duke e çuar procesin drejt dështimit që në nisje.
Sipas kryetares së Komisionit Institucional të Zgjedhjeve, Majlinda Keta, asnjë personalitet publik nuk u vetëkandidua ndonëse në disa media dhe websitin e Universitetit të Tiranës u bë ftesë publike për pjesëmarrje.
Pakti për Universitetin parashikonte që një nga 7 anëtarët e Bordit të Administrimit dhe që përfaqëson Ministrinë e Arsimit do të zgjidhej nga studentët.
Këta të fundit do të duhej që më datë 25 shkurt të votonin për kandidatin e preferuar dhe tre më të votuarit do ti shkonin Ministrisë së Arsimit, e cila ka tagrin për vendosjen e kandidatit fitues.
Por deri më tani asnjë prej proceseve nuk është realizuar. Në këtë rast do të duhet të jetë Ministrja e Arsimit Besa Shahini që duhet të bëjë sërish hapjen e procesit.
Ndërsa, Universiteti i Mjekësisë ka shtyrë afatin e aplikimeve.
Në faqen zyrtare të tij, njoftohet se ky afat shtyhet deri më 18 shkurt.