Trafiku ka qenë disi i rënduar këtë të diel, sepse shumë qytetarë janë drejtuar në pika të tjera të Rivierës së Jonit, që nga Radhima, Orikumi, Llogoraja e të tjera.
Një shëtitje në Lungomare, një kafe në lokalet e shumta, por edhe një foto është ajo çfarë kanë preferuar vizitorët këtë të diel në Vlorë. Por, nuk janë vetëm qytetarët e Vlorës që kanë preferuar të dalin shëtitje e të bëjnë plazh. Ka edhe të huaj, mes të cilëve një qytetare nga Londra, e cila viziton për herë të parë Vlorën.
“Në Vlorë është shumë bukur, duke parë gërshetimin e detit me malin, diellin, që ne në Londër nuk e shijojmë dhe nuk e kemi çdo ditë. Por edhe qyteti vet është i veçantë, ndërkohë që ushqimi tradicional i vendit tuaj është shumë i shijshëm. Po bëj plazh në këtë mot të mrekullueshëm, duke shfrytëzuar ditën e bukur”, tha turistja.
Por, edhe qytetarë vlonjatë kanë nisur plazhin, duke marrë rrezet e para të diellit për këtë sezon. Duket se tashmë, me largimin e ditëve të ftohta, sezoni turistik ka nisur, ndonëse ende jo zyrtarisht.
