15 pyetje nga LSI për ambasadorin e OSBE-së në Tiranë

Shqipëria

15 pyetje nga LSI për ambasadorin e OSBE-së në Tiranë

Më: 19 mars 2019 Në ora: 14:28
Silva Caka

Ambasadori i OSBE-së në Tiranë, Bernd Borchardt, i pyetur nëse do të njihen nga OSBE zgjedhjet lokale pa opozitën, theksoi se kjo varet sesi do të zhvillohen zgjedhjet dhe nga gjetjet e vëzhguesve në terren.

Ish-deputetja e LSI-së, Silva Caka, ka parashtruar 15 pyetje që i drejtohen ambasadorit, ku thotë se: ”Në një kohë kur organizata që vetë Z. Borchardt drejton, ka pranuar dhe faktuar që vullneti zgjedhor i qytetarëve shqiptarë në zgjedhjet e vitit 2017, është deformuar (nëpërmjet shit-blerjes dhe vjedhjes së votës) në masën 20%, atëherë a mund të flitet për demokraci parlamentare?”.

Sipas saj, nuk mund të flitet për demokraci parlamentare në një Parlament, ku ka deputetë apo ministra të lidhur me kriminelë, ku ka ministra që lidhen me blerjen e votës, me korrupsionin galopant që ka përfshirë çdo degë të qeverisë (cit. Raporti i DASH).

Postimi i plotë

Çfarë vlere ka demokracia parlamentare, kur i gjithë shteti është kapur nga Qeveria Demokracia parlamentare nënkupton të lexosh drejt, ndershmërisht dhe të padeformuar vullnetin zgjedhor të qytetarëve dhe ata të përfaqësohen në Parlament nga ata të cilët i kanë besuar votën e tyre.

Në një kohë kur organizata që vetë Z. Borchardt drejton, ka pranuar dhe faktuar që vullneti zgjedhor i qytetarëve shqiptarë në zgjedhjet e vitit 2017, është deformuar (nëpërmjet shit-blerjes dhe vjedhjes së votës) në masën 20%, atëherë a mund të flitet për demokraci parlamentare?

A mund të flitet për demokraci parlamentare në një Parlament që miraton ligje vetëm për klientët e qeverisë?

A mund të flitet për demokraci parlamentare në një Parlament, ku shkelen gjithë procedurat parlamentare?

A mund të flitet për demokraci parlamentare, në një Parlament ku opozita trajtohet si fasadë?

A mund të flitet për demokraci parlamentare, në një Parlament që kthehet në zyrën noteriale të ligjeve ad-personam?

A mund të flitet për demokraci parlamentare në një Parlament që voton Prokurorin e Përgjithshëm me 69 vota?

A mund të flitet për demokraci parlamentare në një Parlament që zgjedh anëtarët e KLP-së dhe KLGJ-së me vezë Kinder edhe pse ata janë kundërshtuar fuqishëm nga Operacioni Ndërkombëtar i Monitorimit?

A mund të flitet për demokraci parlamentare në një Parlament që fsheh raportet e Shërbimit Informativ të Shtetit, për një nga anëtarët e KLP-së?

A mund të flitet për demokraci parlamentare, në një vend ku nuk funksionon Gjykata Kushtetuese? A ka demokraci dhe shtet të së drejtës, në një vend ku nuk ka kush evidenton shkeljet që i bëhen Kushtetutës dhe ligjeve?

A mund të flitet për demokraci parlamentare në një vend, ku nuk funksionon Gjykata e Lartë dhe ku mosrespektimi i afateve ligjore, mund të nxjerrë nga paraburgimi qindra e mijëra të dënuar për vepra të rënda penale?

A mund të flitet për demokraci parlamentare në një Parlament, ku ka deputetë apo ministra të lidhur me kriminelë, ku ka ministra që lidhen me blerjen e votës, me korrupsionin galopant që ka përfshirë çdo degë të qeverisë (cit. Raporti i DASH)?

A mund të flitet për demokraci parlamentare në një Parlament, që kërkon t’a kthejë çështjen e imunitetit të deputetëve në një gjueti shtrigash, me një kuorum që nuk ekziston as në vendet e botës së tretë?

A mund të flitet për demokraci parlamentare në një vend, ku kanë ikur mbi 400.000 qytetarë?

A mund të flitet për demokraci parlamentare, në një Parlament ku Kryeministri është arkitekti i gjithë të këqijave?

A mund të flitet për demokraci parlamentare në një vend, kur aty nuk ekziston më as demokracia në vetvete, pasi na ndan vetëm një fije e hollë nga autokracia dhe autoritarizmi?

Kur Z. Borchardt të ketë një përgjigje për të gjitha këto pyetje, atëherë do të jemi në luksin të diskutojmë demokracinë parlamentare. Deri atëherë, nxjerrja e Shqipërisë nga ky malinjitet qeveritar, mbetet misioni kryesor i opozitës. Anarkia nuk zgjidhet me “recetë” e në këto kushte çdo veprim (sidomos kur mbështetet nga ata që na kanë votuar) mbetet legjitim. Shpresojmë të na mirëkuptoni, por edhe nëse nuk e bëni dot, e rëndësishme mbetet që t’a mirëkuptojnë qytetarët shqiptarë.

commentFirst article
Sot mund të lexoni Shfletoni kopertinat