Brenda 24 orëve, deputeti që rrëmbeu mandatin nga sigla dhe lista e LSI-së është bërë lajm, në çdo media në vend.
Që në orët e para të mëngjesit të djeshëm, Gjoni u bë ‘Lajm’ pasi një i ri e përleu me bojë të kuqe, ndërkohë që ishte nisur drejt seancës për tu betuar. Por edhe pas kësaj, te dera e parlamentit ai lëshoi sërish deklarata delirante, deri edhe fyese për taksapaguesit shqiptarë.
‘Nuk jam këtu për rrogën e qelbur të deputetit...jam shkolluar jashtë...punoj jashtë...kam nënshtetësi të huaj...’, ishin disa nga frazat që shkaktuan zemërim në opinion. Po ditën e djeshme, në rrjet u shpërnda një deklaratë e Ralf Gjonit rreth një muaj më parë, kur deklaronte në studion e, Artur Zhejit, se nëse do të ishte deputet i PD ose LSI do ta digjte urgjent mandatin. Por sapo i erdhi rasti për të treguar integritetin dhe karakterin e tij bëri krejtësisht të kundërtën, duke hedhur dyshime të forta për aktin ‘prej tradhtari dhe të shituri te Rama’, siç po akuzohet rëndom gjatë këtyre ditëve.
Edhe ditën e sotme, tashmë i veshur me petkun dhe imunitetin e deputetit, Ralf Gjoni është shfaqur në deklaratën e tij të parë në FB si ligjvënës, mjaft qesharak dhe meskin. Nëpërmjet një shënimi të shkurtër, Ralf Gjoni, falënderon policinë e Lleshajt dhe Ramës që nuk përmbahet me gaz e arrestime të protestuesve, për mbrojtjen që po i japin atij dhe kolegëve të tjerë renegatë.
Postimi i plotë i statusit të Ralf Gjonit në FB
Shpresën nuk duhet t`a presim si dhuratë nga të tjerët, por duhet t’a krijojmë vetë. Falenderoj Policinë e Shtetit për reagimin e menjëhershëm dhe mbrojtjen e ofruar gjatë ditës së djeshme e në vazhdim, si dhe miqtë dhe njerëzit e mirë të shumtë që më ofruan mbështetjen e tyre gjatë ditës së betimit në Kuvend.
U bëj thirrje të gjithë kandidatëve në listat elektorale të mos intimidohen nga rruga por të marrin përgjegjësitë e tyre në këto momente të vështira për vendin. Askush nuk duhet lejuar të cënojë të drejtën themeltare të përfaqësimit në parlament, përndryshe kemi të bëjmë me terrorizëm politik!