Presidenca rumune e Këshillit të Bashkimit Europian ka kërkuar nga BE që të përmbushë angazhimin e saj për të mbështetur vendet që duan t’i bashkohen unionit.
Presidenca rumune e Këshillit të Bashkimit Europian ka bërë një deklaratë mbi ecurinë e BE, ku thekson se, “politika e zgjerimit është një nga politikat më të suksesshme të BE”.
Këshilli i Ministrave të BE pritet të vendosë në qershor për hapjen e negociatave me Shqipërinë dhe Maqedoninë e Veriut, në këtë kuadër, Presidenca rumune nënvizon se Bashkimi Europian duhet të përmbushë angazhimin e tij për të mbështetur vendet që duan t’i bashkohen unionit duke konsoliduar institucionet, ekonominë dhe zhvillimin social
“Politika e zgjerimit është një nga politikat më të suksesshme të BE. Ne besojmë se Bashkimi Europian duhet të përmbushë angazhimin e tij për të mbështetur vendet që duan t’i bashkohen unionit duke konsoliduar institucionet, ekonominë dhe zhvillimin social. Një bashkëpunim i fuqishëm me vendet në rajon në fushën e migrimit dhe sigurisë do të krijonte një shoqëri më të sigurt për të gjithë ne. Një perspektive e besueshme anëtarësimi mbetet një faktor thelbësor në nxitjen e procesit të pajtimit dhe stabilitetit në kontinent”, thuhet në deklaratën e Bashkimit Europian.