Ministri Blendi Klosi ka paralajmëruar inspektorët e mjedisit se do të mbajnë përgjegjësi penale nëse do të lejojnë hapjen e gropave të reja të gëlqeres në Malin e Krujës.
Klosi: Është e pafalshme që ne dhe i gjithë opinioni publik të lejojmë që kjo zonë të dëmtohet.
Teksa mori pjesë në aksionin për mbylljen e furrës së fundit të gëlqeres, Klosi theksoi se do të ketë kontrolle të vazhdueshme në terren për të ndaluar këtë veprimtari, shkatërruese për mjedisin.
Klosi: Fakti që nuk ka sot asnjë furrë gëlqere nuk do të thotë që nuk do të ketë tentativa të tjera, por për këtë ne jemi të mirëangazhuar që inspektorët e mjedisit, të terrenit dhe agjencitë e zonave të mbrojtura të jenë gjithmon në terren edhe të kontrollojnë në vazhdimësi nëse do të ketë sërish tentativa për të krijuar gropa të reja gëlqereje.
Aksioni për mbylljen e 12 guroreve dhe 26 furrave gëlqerore në Krujë vjen pas krijimit të task forcës së katër ministrive. Kontrolle do të ushtrohen edhe ndaj 300 guroreve që operojnë në të gjithë vendin.
