Sipërmarrja, turizmi dhe kultura ishin në qendër të dëgjesës publike të zhvilluar sot në qytetin e Përmetit nga Komisioni për Integrimin Europian.
Në këtë takim ishin të pranishëm Senida Mesi, nënkryetare e Komisionit për Integrimin Europian, Mirela Kumbaro, deputete e qarkut Gjirokastër, Musa Ulqini deputet, anëtarë të këtij Komisioni, kryetari i këshillit të Qarkut Armand Hila, prefekti i qarkut të Gjirokastrës, Astrit Aliaj, kryetari i bashkisë Përmet, Niko Shupuli, si dhe përfaqësues të organizatave dhe shoqërisë civile të qytetit të Përmetit dhe Rajonit.
Gjatë këtij takimi u diskutua në mënyrë interaktive mbi mundësitë për përthithjen e fondeve për projekte në fushën e sipërmarrjes, turizmit e kulturës, të cilat do të ndihmojnë në zhvillimin e Rajonit duke ndikuar kjo edhe në procesin e Integrimit Europian dhe plotësimin e Rekomandimeve të Bashkimit Europian.
Prefekti i qarkut të Gjirokastrës, Aliaj në fjalën e tij theksoi domosdoshmërinë e rehabilitimit të aksit rrugor Tre Urat – Çarshovë – Përmet si një mundësi reale për zhvillimin e turizmit dhe shkëmbimeve dypalëshe mes dy vendeve fqinjë.
Gjithashtu institucioni i Prefektit të qarkut është duke realizuar disa projekte të përbashkëta ndërkufitare që kanë të bëjnë me zhvillimin e qëndrueshëm të turizmit ndërkufitar, krijimin e shtigjeve dhe vendosjen e teknologjisë në mënyrë që turistët e huaj të cilët vizitojnë qarkun tonë të shpenzojnë më shumë ditë qëndrimi në territorin e qarkut tonë. /atsh
