“Institucionet e Arsimit të Lartë janë autonome dhe askush nuk duhet të guxojë të prekë pavarësinë e tyre”.
Kështu deklaroi sot zëdhënësi i Presidentit të Republikës, Tedi Blushi duke iu referuar dekretit të Metës për rrëzimin e propozimit për shkarkimin e rektorit të Universitetit të Tiranës, Mynyr Koni.
“Presidenti i Republikës ka folur me argumente ligjorë më gjatë se kurdoherë tjetër.
Ministria e Arsimit duhet të mbajë përgjegjësinë e saj të plotë për zbatimin e Reformës në Arsimin e Lartë dhe nëse nuk është dakord me argumentet ligjorë të bëra publike nga Presidenti, të ndjekë procedurën që dikton ligji, përtej retorikave boshe”, u shpreh zëdhënësi i Presidentit.
Ministrja e Arsimit, Sportit dhe Rinisë, Besa Shahini në reagimin pas refuzimit të shkarkimit të rektorit Mynyr Koni nga Presidenti, e cilësoi vendimin në mbështetje të hapur të shkelësit të ligjit.
