Për herë të parë në parlamentin shqiptarë është ulur një deputet me papion. Ai është Kujtim Gjuzi, i cili ishte kujdesur që veshjen ta kishte kuq e zi për debutimin e parë si ligjvënës.
Pas betimit, Gjuzi që vjen nga listat e PD Durrës, tentoi të bëj protagonistin duke tentuar t’i drejtoj disa pyetje guvernatorit Gent Sejko, por hovin ia ndali kryeparlamentari Ruci duke i treguar rregulloren.
U betuan edhe Koci Tahiri nga listat e PD si dhe Klajdi Qama nga ato të LSI. Surprizues u paraqit në kuvend kandidati për deputet Indrit Hoxha.
Momentin kur ai duket të shqiptonte fjalën betohem, ndodhi e kundërta. Indrit Hoxha lexoi një deklaratë përse nuk pranonte mandatin.
“Ky nuk është parlament, por galeri e krimit. Fundi i kësaj farsë kriminale është shumë i afërt. Unë refuzoj të bëj betimin dhe të marr mandatin sepse ai mandat i takon popullit dhe jo kriminelëve, hajdutëve dhe delenxhinjve që ndodhen sot këtu”, tha Indrit Hoxha.
Hoxha u largua menjëherë nga salla e Kuvendit duke iu bashkuar bashkëmoshatarëve të FRPD-s dhe LRI-s që protestuan në mënyrë simbolike me kartona të kuq pasi sipas tyre BE ia ka mbyllur dyert Shqipërisë për shkak të keqqeverisjes së kryeministrit Rama.