Pas 6 orësh protestë ku nuk munguan as aktet e dhunës, demokratët dhe aleatët në një mbledhje të jashtëzakonshme të zhvilluar në mesnatë, vendosën të thërrasin një tjetër protestë kombëtare të hënën në ora 18.30.
Kreu i Partisë Demokratike, Lulzim Basha mësohet të ketë thënë se protestës kombëtare do i paraprijë një tjetër proteste, ajo para drejtorisë së policisë të dielën, ku do kërkohet lirimi i të arrestuarve dhe arrestimi i dhunuesve.
Top Channel mëson se gjatë kësaj mbledhje kryetari Basha ka deklaruar:- “Nuk ka pikë dyshimi që ishte protestë e jashtëzakonshme. Mllefi i njerëzve ka arritur kulmin. Kjo dhunë barbare ndaj protestuesve, arrestimi i tyre dhe veçanërisht arrestimi i Dollapit kërkon një përgjigje te fuqishme”, tha Basha
Pas mbledhjes kryedemokrati bashkë me drejtuesit e lartë të opozitës u drejtuan për në Spitalin e Traumës ku po kurohet sekretari organizativ Sahit Dollapi.
