Shqipëria tashmë është shndërruar dhe në vendin e turizmit elitar ku portet e vendit tonë po mirëpresin kroçerat luksoze me turistë të huaj që vizitojnë vendin tonë si një nga destinacionet e preferuara turistike.
Në portin e Sarandës gjatë muajve të parë të këtij viti vihet re një fluks i kroçerave dhe jahteve turistike.
Drejtoresha e Portit të Sarandës, Kozeta Statha, tha për ATSH-në se “në muajt janar-prill të këtij viti kanë ardhur 60 jahte turistike, 13 tragete turistike dhe 3 kroçera”.
“Duke e krahasuar me 2018 kemi gati një dyfishim të numrit të jahteve, pasi në të njëjtën periudhë të vitit të kaluar porti i Sarandës u vizitua nga 37 jahte turistike dhe nga 3 tragete turistike”, – tha Statha.
Qyteti i Sarandës, njihet për plazhet mahnitëse dhe ujin si kristal. Plazhi i Pllakave, plazhi i Manastirit, i quajtur kështu për shkak se në kodrën sipër tij gjendet një Manastir, plazhi i Pasqyrave, i Ksamilit, etj., ofrojnë për turistët vendas e të huaj gjatë verës pushime mbresëlënëse.
I përkufizuar si “Qyteti i bardhë”, ai është i rrethuar nga kodra dhe përballë tij ndodhet ishulli grek i Korfuzit. Përveç diellit e plazhit, Saranda njihet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit nxit kureshtjen e turistëve të shumtë me historinë e tij mijëravjeçare.
