Komisioni Evropian ka paraqitur para Parlamentit Evropian raportet e progresit për shtetet në procesin e zgjerimit, ku përfshihen shtetet e Ballkanit Perëndimor dhe Turqia. Johannes Hahn edhe kësaj radhe ka rekomanduar çeljen e negociatave për anëtarësim për Maqedoninë e Veriut dhe Shqipërinë.
Komisioneri i BE-së për Politikat Evropiane të Fqinjësisë dhe Negociatat e Zgjerimit Johannes Hahn, duke folur për Shqipërinë dhe Maqedoninë e Veriut, theksoi se duhet të mbahen premtimet për shtetet që aspirojnë për në BE, kur ato i përmbushin kërkesat. Fillimisht Hahn ka lexuar progres raportin, duke kërkuar që të kihen parasysh investimet kineze në Ballkan.
“Të kihen parasysh bizneset e Kinës që po rriten në Ballkan, që edhe në se ofrojnë lehtësi, mund të sjellin probleme. Është me rëndësi që të sigurojmë se çdo aktivitet i huaj në rajon, të përmbushë standardet e BE-së. Sa i përket vendeve të caktuara, vendet janë përgjigjur strategjisë për Ballkanin. Jam i kënaqur se si Shqipëria dhe Maqedonia e Veriut kanë reaguar. Jam i kënaqur për Shqipërinë për reformën në drejtësi dhe në lidhje se si Maqedonia e Veriut zgjidhi çështjen e emrit”, tha ai.