Partia Demokratike thotë se përgjimet e publikuara nga "Bild" për Durrësin dhe Dibrën, janë dëshmi e qartë se kryeministri Edi Rama jo vetëm ka përdorur krimin për të ardhur në pushtet, por vazhdon bashkëpunimin me të. Sekretari i Përgjithshëm, Gazmend Bardhi, tha se kryeministri dhe vartësit e tij duhet të ishin në burg, ndërsa ish-deputeti Alibeaj tha se vepra penale që ai ka kryer në bazë të kodit penal dënohet nga 1 deri në 3 vite burg. Sekretari për Çështjet Ligjore tha se mbi personat e dalë në përgjimet e "Bild", duhet të rëndojë akuza për organizatë kriminale.
Sekretari i Përgjithshëm i Partisë Demokratike, Gazmend Bardhi, në një dalje për mediat bashkë më ish-deputetin Enkelejd Alibeaj dhe Sekretarin Ligjor, Çlirim Gjata, tha se Durrësi dhe Dibra vërtetuan se Edi Rama bashkëpunon ngushtë me krimin për të blerë vota e shantazhuar qytetarët.
Zyrtari i lartë demokrat tha se këto dy qarqe nuk janë raste të izoluara.
Bardhi: Edi Rama, qeveria dhe PS kanë vepruar si një grup i strukturuar kriminal për të marrë dhe mbajtur pushtet në mënyrë të paligjshme.
Ndërsa Alibeaj citoi kodin penal per t’iu treguar qytetarëve shkeljet e ligjit nga zyrtarët socialistë, të cilët ishin protagonistë në përgjimet e publikuara nga gazeta gjermane "Bild".
Alibeaj: Kodi penal në nenin 328/a parashikon këtë hipotezë: Përdorimi nga një punonjës që kryen detyrë shtetërore dhe ai që kryen këtë detyrë shtetërore dhe e përdor është vetë kryeministri i vendit, funksionari më i lartë që përdor burimet njerëzore me qëllim favorizimin e një partie politike ose kandidati në zgjedhje. Kjo përbën shkelje ligji dhe dënohet me burg nga 1-3 vjet.
Ndërsa këshilltari ligjor, Çlirim Gjata, tha se akuza që duhet të rëndojë ndaj zyrtarëve socialistë të dalë në përgjime, është grup i strukturuar kriminal.
Gjata: Këtu kemi të bëjmë me grup të strukturuar kriminal? Unë mendoj se po. Kush janë këta çunat që vinë me furgon, ata shkokan te shtabi i këtij Keshit.
Partia Demokratike thotë se vetëm këto përgjime të bëra publike dëshmojnë pse kryeministri Edi Rama, ka bërë gjithçka të kapë drejtësinë.