Gjykata e Durrësit rrëzon veten, njeh Sakon si kryebashkiake - Bota Sot
Gjykata e Durrësit rrëzon veten, njeh Sakon si kryebashkiake

Shqipëria

Gjykata e Durrësit rrëzon veten, njeh Sakon si kryebashkiake

Më: 20 korrik 2019 Në ora: 09:37
Valbona Sako

Në letrën drejtuar Gjykatës së Durrësit, e cila mbante firmën e Edi Ramës, kërkohej shpallja fituese e Valbona Sakos për zgjedhjet e 30 qershorit, e njëjta kërkesë që ishte rrëzuar më parë nga kjo gjykatë.

VENDIMET

Vendimi i parë për të shpallur fituese kandidaten e PS-së u paraqit pranë Gjykatës së Durrësit nga vetë Valbona Sako. Në këtë proces gjyqësor, kandidatja Sako nuk u shpall fituese nga ana e gjyqtares Mimoza Margjeka, e cila theksoi se si gjithë procesi zgjedhor i 30 qershorit ishte i parregullt, pasi nuk ishin respektuar afatet ligjore në regjistrimin e kandidates së Bindjes Demokratike po për këtë bashki.

Kërkesa e dytë për certifikimin e zgjedhjeve të 30 qershorit për Bashkinë e Durrësit u bë nga Partia Socialiste duke ndryshuar kërkuesit, por jo objektin e kërkesës pasi këtë herë letra ishte firmosur nga kreu i PS-së, Edi Rama.

Këtë proces gjyqësor e drejtoi gjyqtari Shpëtim Reka, i cili certifikoi zgjedhjet e 30 qershorit, duke dhënë një vendim që bie në kundërshtim me një tjetër vendim të dhënë nga kjo Gjykatë dy ditë më parë.

Nga shqyrtimi i bërë nga ana e Shpëtim Rekës, Gjykata e Durrësit njeh Valbona Sakon si kryebashkiaken e re të qytetit bregdetar, pas kërkesës së dorëzuar nga Partia Socialiste si palë më vetë në proces. Sipas vendimit të dhënë, theksohet se: “Do të ishte nonsens që partia politike apo koalicioni përkatës të konsiderohej se nuk ka interes të ligjshëm në kërkimin për vërtetimin e mandatit të kryetarit të bashkisë.

Në përfundim të kësaj analize, Gjykata arrin në konkluzionin se nuk ekzistojnë pengesa procedurale që do të pengonin shqyrtimin nga ana e saj të kërkesës së Partisë Socialiste të Shqipërisë për vërtetimin e mandatit si Kryetare e Bashkisë, Durrës, të Znj. Valbona Sako”, thuhet në vendimin e dhënë nga gjyqtari Shpëtim Reka.

BASHKIA VORË

Të njëjtën strategji, Partia Socialiste po ndjek edhe për Bashkinë e Vorës. Dje, Partia Socialiste dorëzoi në Gjykatën e Tiranës kërkesën për njohjen e Agim Kajmakut, me firmë të Kryeministrit Rama, si kryetar i Partisë Socialiste, ndërsa shorti pritet të hidhet të hënën për të caktuar gjykatësin e çështjes.

Më herët, Gjykata e Tiranës, me gjyqtare Arjana Gunbardhi, ndryshe nga ajo e Durrësit, për vërtetimin e mandatit të kryebashkiakut Agim Kajmaku, shpalli moskompetencë, duke ia deleguar çështjen Gjykatës Administrative.

Dy vendimet e para të dhëna nga Gjykata e Durrësit dhe ajo e Tiranës ishin të vetmet që dolën kundër procesit zgjedhor të 30 qershorit ku kërkues ishin vetë kandidatët e PS-së, pasi gjykatat e tjera në vend kanë certifikuar procesin në bashki të ndryshme si Elbasan, Krujë etj.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...