Gjatë kontrollit që po ushtrohej në zonë për të zbuluar autorët për vrasjen e Laver Tozaj mbrëmjen e djeshme në Selenicë të Vlorës, policia njofton se ka vënë në pranga një 27 vjeçar, i kapur në flagrancë teksa mbante me vete një armë automatike.
Policia bën me dije se fjala është për shtetasin me inicialet S.R, i cili u piketua në afërsi të malit të Beunit të fshatit Matogjin. Policia në njoftimin e saj nuk jep detaje nëse 27 vjezçari është apo jo pjesë e autorëve të dyshuar në lidhje me vrasjen e djeshme në Selenicë të Vlorës.
Njoftimi i policisë:
Shërbimet e Komisariatit të Policisë Selenicë në bashkëpunim me forcat e tjera të Policisë së Vlorës dhe ato të FNSh-së, në vijim të kontrolleve dhe krehjes së zonës duke përdur dhe qenin e gjurmës në lidhje me ngjarjen e Selenicës, kapen në flagrancë shtetasin S. R., 27 vjeç, banues në fshatin Vajzë të Selenicës.
27 vjeçari u kap në kushtet e flagrancës afër malit të Beunit, të fshatit Matogjin i cili mbante me vete një armë zjarri automatik me municion luftarak.
Gjithashtu, nga hetimet e kryera ka rezultuar se ky shtetas ka qenë i dënuar më parë për vjedhje me armë në shtetin grek.
Materialet iu referuan Prokurorisë në ngarkim të tij për veprën penale “Mbajtja pa leje dhe prodhimi i armëve, armëve shpërthyese dhe municioneve”.