Mbështetja e SHBA për mbrojtjen, Xhaçka: Mirënjohje për aleatin më të madh të shqiptarëve - Bota Sot
Mbështetja e SHBA për mbrojtjen, Xhaçka: Mirënjohje për aleatin më të madh të shqiptarëve

Shqipëria

Mbështetja e SHBA për mbrojtjen, Xhaçka: Mirënjohje për aleatin më të madh të shqiptarëve

Më: 10 shtator 2019 Në ora: 15:50
Olta Xhaçka

Miliona dollarë investime dhe qindra projekte që kanë modernizuar ndjeshëm Forcat e Armatosura Shqiptare duke kulmuar me bazën e ardhshme ajrore të NATO-s në Kuçovë.

Kjo është vëmendja që Shtetet e Bashkuara të Amerikës kanë treguar për Shqipërinë, vëmendje e cila në dy vitet e fundit ka shënuar një nivel shumë domethënës. Në shenjë vlerësimi për kontributin e SHBA në fushën e sigurisë e mbrojtjes në Shqipëri, në një ceremoni ku merrte pjesë edhe e dërguara me punë e SHBA-së Leyla Moses Ones, ministrja e Mbrojtjes Olta Xhaçka, nderoi me Medaljen e Mirënjohjes, Zyrën e Atasheut Ushtarak të SHBA në Tiranë dhe Zyrën e Bashkëpunimit Ushtarak në Tiranë.

“Siç kam pasur rastin ta bisedoj gjatë të dy vizitave që kam zhvilluar me homologët e mi në Pentagon, në terma të kontributit për frymë Shqipëria renditet e dyta pas SHBA.Vitet 2018 dhe 2019 shënuan një periudhë jashtëzakonisht të suksesshme për këtë bashkëpunim sepse investimet e SHBA në fushën e mbrojtjes në Shqipëri nuk kanë njohur asnjëherë një vëmendje më të madhe. Forcat tona të Armatosura janë duke u shndërruar sot në një forcë ushtarake moderne, me një nivel profesionalizmi që i lejon të marrë pjesë në misionet e NATO krah për krah me kolegët tanë amerikanë e europianë”, u shpreh Ministrja e Mbrojtjes.

Ajo nënvizoi kontributin e SHBA në reformën në drejtësi.

“Sot, kur falë mbështetjes së vendosur e të pakursyer të partnerëve tanë amerikanë, Shqipëria po hyn në fazën më jetike të zbatimit të reformës në drejtësi, është fare e qartë për çdo qytetar shqiptar sesa e rëndësishme është kjo mbështetje dhe çfarë roli vendimtar kanë luajtur e vazhdojnë të luajnë Shtetet e Bashkuara në mbështetje të aspiratës së shqiptarëve për të ndërtuar një shtet e një shoqëri evropiane, të bazuar tek sundimi i ligjit dhe vlerat e parimet e demokracisë”, nënvizoi Ministrja e Mbrojtjes.

Sipas Ministres Xhaçka, ashtu siç kanë treguar gjatë këtyre viteve se dinë të jenë partnerë të përgjegjshëm dhe besnikë, të vendosur për të përmbushur detyrimet e pritshmëritë që kanë aleatët, po njësoj FA do të vazhdojmë edhe në të ardhmen të japin kontributin e tyre në çdo mision apo situatë ku do të jetë e nevojshme për të garantuar sigurinë e SHBA, aleancës dhe rajonit.

Shtetet e Bashkuara të Amerikës, sipas të ngarkuarës me punë Leyla Moses – Ones përgëzojnë Shqipërinë për angazhimin e saj për bashkëndarjen e barrës për NATO-n dhe mbështet përpjekjet e saj të vazhdueshme deri në vitin 2024.

“Shtetet e bashkuara mbështesin Forcat e Armatosura shqiptare sepse kanë treguar pafundësisht ndër vite, se janë të gatshme, të përgatitura dhe të afta të luftojnë krah për krah me trupat amerikane dhe të NATO-s, kudo në çdo kohë dhe në çfarëdo kushtesh. Për më tepër Shqipëria ka respektuar zotimet samitit të Ëellsit dhe vazhdon të ris shpenzimet për mbrojtjen kombëtare drejt qëllimit të 2 % të Prodhimit të Brendshëm Bruto”, u shpreh e ngarkuara me punë e SHBA.

Kontributi i SHBA për fushën e mbrojtjes e sigurisë në Shqipëri shtrihet që nga automjetet e blinduara për grup batalionin e këmbësorisë së lehtë, qendra për reagimin kibernetik, trajnimi dhe arsimimi i efektivëve, pajisja e Forcës Ajrore me helikopterë BlackHawk, projektet në sistemin e ndërlidhjes apo pajisjet me vlerë se 1 milion dollarë për përgjigjet ndaj përmbytjeve dhe më shumë se 800 milion dollarë ndihmë humanitare çdo vit.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...