Lange-Ruçit: Lobojmë në Bundestag për PO Shqipërisë - Bota Sot
Lange-Ruçit: Lobojmë në Bundestag për PO Shqipërisë

Shqipëria

Lange-Ruçit: Lobojmë në Bundestag për PO Shqipërisë

Më: 17 shtator 2019 Në ora: 15:06
Gramoz Ruçi dhe Christian Lange

Kryetari i Kuvendit, z. Gramoz Ruçi, priti sot Sekretarin Parlamentar të Shtetit për Drejtësinë të Gjermanisë, z. Christian Lange, i cili po zhvillon një vizitë zyrtare në Shqipëri.

Kryetari i Kuvendit Ruçi e përditësoi Sekretarin Lange mbi ecurinë e zbatimit të rekomandimeve të Këshillit Europian në pesë prioritetet kyçe si edhe mbi bashkëpunimin në fushën e drejtësisë, duke u fokusuar kryesisht në arritjet e reformës në drejtësi.

“Shqipëria ka arritur rezultate të prekshme në zbatimin e reformave transformuese dhe pesë prioriteteve kyçe, veçanërisht në reformimin e sistemit të drejtësisë, luftën ndaj korrupsionit dhe krimit të organizuar. Reforma në drejtësi është e pakthyeshme dhe e papengueshme. Ne falenderojmë Gjermaninë si një mbështetëse e fortë e integrimit europian të Shqipërisë. Deklarata e Kancelares Merkel se “Një Evropë me të vërtetë e bashkuar përfshin Ballkanin Perëndimor”, është një inkurajim i madh për vlerësimin e përpjekjeve që po bëjmë për të merituar çeljen e negociatave në tetorin që vjen.”, vuri në dukje Kryetari i Kuvendit, z. Gramoz Ruçi.

Sekretari i Shtetit, z. Christian Lange, i cili është hera e tretë që viziton Shqipërinë, shprehu vlerësimin e Gjermanisë për arritjet e Shqipërisë në fushën e reformave dhe zbatimit të rekomandimeve të Këshillit Europian. “Shqipëria dhe gjithë Ballkani Perëndimor janë në fokusin e veçantë të Gjermanisë. Ecuria e reformave në Shqipëri është e sukseshme dhe kjo u konfirmua nga të gjithë faktorët ndërkombëtarë. Jam i impresionuar në mënyrë të veçantë nga suksesi i reformës në drejtësi. Me po këto ritme duhet të ecë edhe reforma zgjedhore. Qeveria gjermane po lobon fort në Bundestag që në mbledhjen e tetorit të shkojmë me një PO për Shqipërinë.”, konfirmoi Sekretari Parlamentar i Shtetit për Drejtësinë, z. Christian Lange.

Kryetari i Kuvendit, z. Gramoz Ruçi, dhe Sekretari Parlamentar për Drejtësinë i Gjermanisë, z. Christian Lange, biseduan edhe mbi disa aspekte të situatës politike në Shqipëri.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...