Kryeministri i Shqipërisë, Edi Rama zhvilloi mëngjesin e sotëm një takim me drejtues të Ministrisë së Mbrojtjes, Ministrisë së Brendshme, Emergjencës Civile, Rezervës së Shtetit dhe të gjithë prefektët e vendit.
Gjatë takimit, ministrja e Mbrojtjes Olta Xhaçka deklaroi se janë ngritur grupet e punës për dëmshpërblimet.
“Ka qenë një ditë e vështirë dje për të përballuar pasojat e para të një tërmeti relativisht të fortë. Ka qenë një natë intensive për shtabet e emergjencës, prefektët, bluzat e bardha dhe të gjithë të tjerët, që kanë qenë në terren për të ndihmuar ata që kaluan natën jashtë. Ky moment shoqërohet me frikë dhe pasiguri”, tha Xhaçka.
Ajo tha se “shumë familje me fëmijë të vegjël dhe që nuk kanë siguri nga banesat e tyre, janë të detyruar të refuzojnë hyrjen në banesë”.
“Grupet e vlerësimit të dëmeve janë ngritur. Janë ngritur shumë qendra që mund të presin të gjithë qytetarët, kryesisht në Tiranë dhe Durrës. Mund të bëhej një punë akoma më e mirë. Të ngremë një orë e më parë grupet e vlerësimit të punës dhe për të siguruar të gjithë qytetarët për t’i dëmshpërblyer”, u shpreh Xhaçka.
