Mblidhet Këshilli bashkiak i Tiranës, Veliaj: 35 banesa të pabanueshme

Shqipëria

Mblidhet Këshilli bashkiak i Tiranës, Veliaj: 35 banesa të pabanueshme

Më: 22 shtator 2019 Në ora: 19:39
Pamje nga takimi

Nisur nga situata në vend, pas rënies së tërmeteve të djeshme u mblodh Këshilli Bashkiak i Tiranës, ku kryebashkiaku Erion Veliaj u shpreh se më e keqja ka kaluar.

Me këtë rast u tha se një problem të veçantë, përveç fëmijëve të traumatizuar përbëjnë edhe të moshuarit.

Veliaj tha se janë shtuar vaktet ushqimore si dhe janë ofruar shtretër të ri.

“Konviktet do të shërbejnë si strehë meqë universiteti nuk ka filluar ende. Formula më afatgjatë do të jenë banesat sociale. Kemi 35 banesa të pabanueshme, rreth 420 banesa moderisht të dëmtuara. Prioritet do t’u jepet njerëzve që janë me ndihmë ekonomike. Të atashohemi secili në zona të ndryshme, të ndihmojmë të gjithë”, tha Veliaj.

Ndryshe, gjatë ditës kryetari i Bashkisë së Tiranës, Erion Veliaj dhe zëvendëskryeministri Erion Braçe ndoqën nga afër situatën në terren në zonën e Kasharit, ku është raportuar për disa familje të prekura nga lëkundjet e fuqishme të tërmetit.

Zëvendëskryeministri Braçe i bëri thirrje të gjithë banorëve që kanë pësuar dëmtime apo kanë probleme të shkaktuara nga tërmeti, të paraqiten sa më parë pranë njësive administrative apo institucioneve të tjera të emergjencës, në mënyrë që strukturat shtetërore t’i vijnë sa më parë në ndihmë.

Ai gjithashtu përkrahu propozimin e kryetarit të Bashkisë së Tiranës për lehtësimin e procedurave ligjore dhe shmangien nga taksat e të gjithë atyre që do të rindërtojnë apo ri-konstruktojnë banesat e tyre./tch

commentFirst article
Sot mund të lexoni Shfletoni kopertinat