Ish-deputeti demokrat, Agron Shehaj, i ëhstë rikthyer denoncimi të bërë dy ditë më parë lidhur me tenderin korruptiv mbi 21 milionë euro për blerjen e karburantit për të gjitha institucionet shtetërore, për tre vitet e ardhshme.
Shehaj thotë se tenderi u zhvillua pa garë, me fitues të paracaktuar, me një çmim më të lartë se çmimi i pakicës.
Dje Ministria e Brendshme reagoi për çështjen, Shehaj thotë se komunikata ishte qesharake.
Sipas ish-deputetit, Ministria e Brendshme gënjeu duke thënë se çmimi i blerjes nuk është 177,1 lekë për litër, sa u denoncua prej tij, por 170 lekë për litër.
Po edhe sikur të marrim çmimin e gënjeshtërt të Ministrisë, 170 lekë për litër, vijon Shehaj, sot nafta me pakicë shitet me 158-168 lekë për litër (fotot janë bërë sot në mëngjes).
"Vetëm një qeveri e korruptuar dhe e kapur mund të blejë miliona litra karburant me një çmim shumice më të shtrenjtë se çmimi i pakicës i pompave të karburantit" deklaron Shehaj duke e cilësuar vjedhje dhe korrupsion të pastër që sipas tij duhet të hetohet menjëherë.
