Kandidatja për kryeprokurore të Shqipërisë Fatjona Memçaj ka dhënë këtë të mërkurë intervistën e saj para Kontrollit të Lartë të Shtetit, duke shprehur vullnetin e saj për të drejtuar organin e akuzës.
Memçaj shpalosi idetë dhe platformën e saj duke u shprehur se me ndryshimet e reja ligjore roli i kryeprokurorit po ashtu ka ndryshuar. Memçaj thotë se prokurorët kanë mbingarkesë në punë dhe se është bërë mjaft e nevojshme ngritja e Inspektoriatit të Lartë të Drejtësisë, institucioni i cili do të kontrollojë gjyqtarët dhe prokurorët.
Ibrahimi: Si e shikoni rolin e Prokurorisë së Përgjithshme pas Reformës në Drejtësi?
Memçaj: Në qoftë se ka komunikim asgjë nuk është e vështirë edhe me intitucionet e reja të reformës. Prokuroria e Përgjithshme ka detyrë të raportoj para KLP e parlamentit mbi aktivitetin që kryen. Marrëdhëniet me KLP nuk janë formale por bashkëpunuese. Nuk di nëse prokurori i Përgjithshëm ka raportuar për gjendjen aktuale të prokurorive. Kemi prokurori me mbingarkesë pune. Nuk më pëlqen formalizimi, për të gjetur zgjidhje ka nevojë për debat.Prokurori i Përgjithshëm duhet të shkojë në parlament të flas për atë që ka realizuar, jo përse nuk u realizua. Për funksionimin e një prokurorie është i rëndësishëm buxheti. Shpresojmë që ILD të ngrihet deri në fundvit.
Kandidatja për Prokurore të Përgjitshme Fatjona Memçaj ka prezantuar para KLP eksperiecën e saj. Ajo tha se synon të vendosë autoritet që demontrojë atë që njerëzit presin.
“Nga Janari i vitit 2018 kam qenë në drejtorinë juridike në presidencë. Më pas kam qenë në kabinetin e Prokurorisë së Përgjithshme. Më pas me dekret të presidentit kam qenë prokurore në Prokurorinë e Apelit. Kam gradën Dr. shkencash. Kam 18 vite eksperiencë, kam dhënë mësim në Universitete private e publike, kam qenë anëtare e bordit të magjistraturës. Platforma ime është e ndërtuar mbi strategji e politika që duhet të ndiqen, përfshi burimet njerëzore e finaciare. Kërkohet autoritet lidership të demontsrojë atë që njerëzit presin, implementimin e Reformës në Drejtësi. Duhet të renditemi me dinjitet me të gjithë partnerët tanë në botë po ashtu në luftën kundër krimit”, tha Memçaj.