Situata pas tërmetit, ish-kryebashkiaku i Durrësit: Problemi nuk zgjidhet me servila

Shqipëria

Situata pas tërmetit, ish-kryebashkiaku i Durrësit: Problemi nuk zgjidhet me servila

Më: 1 dhjetor 2019 Në ora: 22:03
Arqile Gorea

Kriza e krijuar pas tërmetit të 26 nëntorit duhet të zgjidhet nëpërmjet strukturave konkrete të specializuara. I ftuar në studion  e lajmeve në RTV Ora, ish-kryebashkiaku i Durrësit Arqile Gorea tha se problemi nuk zgjidhet me servila.

Arqile Gorea: Kemi një fat të madh që kemi një solidaritet njerëzor,  jo vetëm kombëtar por edhe të strukturave ndërkombëtare. Shohim inxhinierë, francezë, amerikanë, po inxhinierët shqiptarë ku janë? A janë organizuar këta? Këta nuk i kanë ftuar, këta janë pjesë e komunitetit, janë pjesë e dhimbjes, por edhe pjesë e zgjidhjes. Këta janë njerëz që me përgjegjësinë maksimale, duke e përjetuar situatën do të marrin indikacione të realitet dhe do flasin për atë që ka ndodhur. Kjo nuk zgjidhet me servila që shohin shefat në sy dhe thonë: "I pëlqen shefit të themi ka ndodhur hataja, ka ndodh hataja do të themi. I pëlqen shefit të thotë nuk është ndonjë gjë e madhe, nuk është gjë e madhe do themi". Kjo krizë kërkon zgjidhje nëpërmjet strukturave konkrete të specializuara, pra kërkon një mobilizim maksimal të fuqive dhe potencialeve që ka komuniteti për të zgjidhur hallin e madh. Unë shpresoj dhe besoj që qyteti i Durrësit i ka të gjitha mundësitë dhe forcat, jo vetëm për të verifikuar situatën, por dhe angazhimi i këtyre njerëzve, por edhe vetë komunitetit për zgjidhjen e krizave duke krijuar ato struktura që quhen qytetare, që lidhin komunitetin me qeverisjen, që lidhin komunitetin me hallin e madh që i ka rënë duhet të fillojnë të funksionojnë.

Sipas ish-kryebashkiakut Gorea, në këtë moment nuk është koha për të gjetur fajtor apo për të bërë politike, por duhet menduar për daljen nga kjo situatë.

Arqile Gorea: Nuk është koha për të bërë politikë, as për të rendur për të gjetur fajtorët, por është koha si do dalim nga kjo situatë. Unë mendoj se për daljen nga kjo situatë një faktor i rëndësishëm është komuniteti. Komuniteti duhet të fillojë të përjetojë shpresën përtej dëshpërimit.

commentFirst article
Sot mund të lexoni Shfletoni kopertinat