Kthehen në Shqipëri familjet që u strehuan në Kosovë pas tërmetit - Bota Sot
Kthehen në Shqipëri familjet që u strehuan në Kosovë pas tërmetit

Shqipëria

Kthehen në Shqipëri familjet që u strehuan në Kosovë pas tërmetit

Më: 5 dhjetor 2019 Në ora: 20:33
Foto nga vendi

Vetëm gjashtë persona nga Shqipëria kanë mbetur në palestrën e gjimnazit “Gjon Buzkuku” në Prizren, nga 120 sa ishin të strehuar pas tërmetit.

Xhevahir Ragipi ka qëndruar një javë këtu me familjen e tij dhe të enjten po pret që të niset për në Durrës, raporton KTV.

Qytetarë tjerë që u strehuan në Prizren pas tërmetit të 26 nëntorit, po kthehen në mënyrë vullnetare nëpër shtëpitë e tyre.

Drejtori i Emergjencës në Prizren, Faruk Dakaj thotë se ata po kërkojnë vetë që të kthehen në Durrës, derisa komuna është duke ua siguruar transportin.

Ndërkohë, thirrje qytetarëve për t’u kthyer në Shqipëri u ka bërë të enjten edhe kryeministri shqiptar, Edi Rama.

Rama ka deleguar ministren e Arsimit, Besa Shahini, dhe atë të Shëndetësisë, Ogerta Manastirliu, që të vijnë në Kosovë dhe t’i bindin njerëzit të kthehen.

Ai ka theksuar se situata po shkon drejt përmirësimit dhe të kthyerit do të akomodohen nëpër hotele.

Shumë shqiptarë, pas tërmetit javën e kaluar në Shqipëri, ku humbën jetën 52 persona, gjetën strehim në Kosovë.

Vetëm në Kampin Inovativ në Prizren, u sistemuan mbi 500 persona.

Shfaq komentet
comments powered by Disqus
Sot mund të lexoni Shfletoni kopertinat