Komisioni i Venecias do të diskutojë në muajin mars çështjet që lidhet me procedurat për emërimin e anëtarëve të Gjykatës Kushtetuese, por edhe rolin e Presidentit Ilir Meta.
Kjo është bërë e ditur në përgjigje që ky komisioni i ka dërguar Parlamentit shqiptar.
Thomas Markert, sekretar i Komisionit në letrën drejtuar Ruçit shkruan se Komisioni i Venecias do të diskutojë për një opinion në sesionin e marsit.
Në 30 dhjetor 2019 Kuvendi i dërgoi një letër Presidentit të Komisionit të Venecias Gianni Buquicchio, ku i parashtron të gjithë ato që kanë ndodhur me Këshillin e Emërimeve në Drejtësi dhe përzgjedhjen e kandidaturave për plotësimin e vakancave në Gjykatën Kushtetuese dhe më pas i drejton edhe 6 pyetje.
Ndërkohë edhe Presidenti i Republikës ka paralajmëruar se do t’i drejtohet Komisionit të Venecias në lidhje me shkeljet kushtetuese të Kuvendit të Shqipërisë, në procesin e zgjedhjes së anëtareve të Gjykatës Kushtetuese.