Policia e Tiranës ka zhvilluar pasditen e sotme një aksion të madh ku janë shoqëruar rreth 40 persona, në bazë të urdhër-ndalimeve të lëshuara nga Prokuroria për pasojat e tërmetit të 26 nëntorit.
Ndër të shoqëruarit, ka zyrtarë dhe ish-zyrtarë të dyshuar se kanë abuzuar me detyrën apo kanë ndërhyrë në strukturën e ndërtimeve që kanë pësuar dëmtime pas tërmetit të 26 nëntorit. Bien në sy mes tyre dy ish-kryekomunarët e PD për Farkën dhe Kasharin, Fatbardh Plaku dhe Besnik Fuçia. Por të dy të shoqëruarit nuk janë emra të panjohur për publikun e gjerë.
I pari, Fatbardh Plaku u bë kryelajm i mediave në vitin 2014 pasi persona të maskuar dhe të paidentifikuar i qëlluan shtëpinë private me predha anti-tank, në zonën e Farkës së Vogël. Siç shihet dhe në foton kryesore dhe në fotot shoqëruese të lajmit, vila e kryekomunarit të Farkës qëllohet me predhë anti-tank në pjesën ballore, nga 100 metra largësi.
Ndërkohë, dhe ish-kryekomunari tjetër i PD Besnik Fuçia, është arrestuar në muajt e parë të 2019 bashkë me 5 zyrtarë të tjerë të ish-kumunës së Kasharit me akuzën e falsifikimit të dokumenteve lidhur me ndërtimin e dy pallateve në zonën e Yzberishtit në kryeqytet.
Në fund të procesit gjyqësor, ish-kryetarit të komunës së Kasharit iu dha masa e dënimit “Detyrim paraqitje”.
