E vrau shoku! Kush është i riu me tre identitete, që ekzekutoi Vilson Tafçiun

Shqipëria

E vrau shoku! Kush është i riu me tre identitete, që ekzekutoi Vilson Tafçiun

Më: 22 janar 2020 Në ora: 12:05
 Vilson Tafçiu

Është identifikuar dhe shpallur në kërkim nga policia autori i vrasjes së 29-vjeçarit  Vilson Tafçiu, i cili u ekzekutua me tre plumba në zonën e Astirit më 20 janar.

Sipas policisë ngjarja ka ndodhur si pasojë e një konflikti të çastit mes viktimës dhe autorit 29-vjeçar Noel Disha nga Dibra. Disha ka qenë shok me Vilson Tafçiun, madje së bashku kanë qenë dhe në emigrim, kohë kur viktima u mor me trafik të drogës e madje dhe u burgos në Francë.

Autori i vrasjes njihet po ashtu edhe me dy identitete të tjera, që sipas policisë janë N.K dhe M.P.

29-vjeçari është shpallur në kërkim, ndërkohë që policia ka ushtruar një sërë kontrollesh në disa ambiente ku dyshohej se mund të fshihej Disha.

Njoftimi i Policisë:

Strukturat e Drejtorisë Vendore të Policisë Tiranë, nën drejtimin e Prokurorisë së Tiranës, po vijojnë intensivisht punën për zbardhjen dhe dokumentimin me prova ligjore të ngjarjeve të ndodhur në Allias dhe në Astir.

Si rezultat i punës profesionale, reagimit të menjëhershëm të strukturave të Policisë dhe  bërjes së një sërë veprimesh proaktive, grupi i posaçëm hetimor ka mundur të dokumentojë me prova ligjore ngjarjen e ndodhur në orët e mbrëmjes së datës 20 janar 2020 në Astir, ku mbeti i vrarë me armë zjarri 29-vjeçari V. T.

Bazuar në veprimet e kryera dhe  provat e grumbulluara rezulton se si pasojë e një konflikti të çastit, shtetasi N. D., alias N. K., alias M.P., 29 vjeç, në orën 20:30 të mbrëmjes së datës 20 janar, në rrugën “Dhaskal Todri”, në Unazën e Re, ka qëlluar disa herë me armë zjarri duke  vrarë shtetasin V. T.

Policia e Tiranës ka shpallur në kërkim policor 29-vjeçarin dhe gjatë ditës së djeshme dhe mëngjesit të sotëm ka ushtruar një sërë kontrollesh në disa ambiente dhe terrrene, ku dyshohej se mund të fshihej 29-vjecari dhe vijon punën e pandërprerë për kapjen e tij.

Policia e Tiranës garanton qytetarët se është tërësisht e angazhuar për të parandaluar, evidentuar dhe goditur paligjshmërinë, si dhe fton qytetarët për të bashkëpunuar më tej, në drejtim të krijimit të një ambienti sa më të sigurt.

commentFirst article
Sot mund të lexoni Shfletoni kopertinat