Gjyqtarët e Kushtetueses, Meta kërkon mendimin e Komisionit të Venecias: Asnjë reflektim nga Kuvendi - Bota Sot
Gjyqtarët e Kushtetueses, Meta kërkon mendimin e Komisionit të Venecias: Asnjë reflektim nga Kuvendi

Shqipëria

Gjyqtarët e Kushtetueses, Meta kërkon mendimin e Komisionit të Venecias: Asnjë reflektim nga Kuvendi

Më: 23 janar 2020 Në ora: 15:01
Ilir Meta

Presidenti Ilir Meta i është drejtuar Komisionit të Venecias “Për dhënien e një opinioni mbi procesin e zgjedhjes së anëtarëve të Gjykatës Kushtetuese në Republikën e Shqipërisë”.

Presidenti, gjithashtu ka përcjellë për Komisionin e Venecias një informacion të zgjeruar mbi veprimtarinë e Presidentit të Republikës, Kuvendit të Shqipërisë dhe Këshillit të Emërimeve në Drejtësi (KED) në lidhje me këtë proces.

Kreu i shtetit thotë se nuk pati asnjë reflektim nga Kuvendi ndaj këshillave të Komisionit të Venecias dhe se të dhënat e shtrembëruara dhe pyetjet vetësugjeruese të Kuvendit synojnë lexim të gënjeshtërt të situatës.

Presidenti dërgoi informacion të plotë të dokumentuar, dhe një listë pyetjesh që qartësojnë kushtetutshmërinë e veprimeve të secilit.

-Përse kërkoi Venecia përcaktimin në Kushtetutë dhe ligj të radhës së emërimeve?

-Mosrespektimi i radhës a përbën shkelje të gërmës së Kushtetutës?

-Cila dispozitë kushtetuese parashikon që një institucion të emërojë disa gjyqtarë kushtetues njëkohësisht?

Presidenti shprehet se kërkoi vazhdimisht bashkëpunim dhe zbatim të Kushtetutës dhe se mazhoranca refuzoi bashkëpunimin dhe çoi deri në fund skenarin e saj.

Po ashtu thuhet se Kuvendi tentoi rrëmbimin e kompetencave kushtetuese të Presidentit me qëllim kapjen e Gjykatës Kushtetuese.

“Kur Qeveria, Kuvendi, të gjitha Bashkitë, Këshillat Bashkiakë dhe thuajse të gjitha institucionet e pavarura, janë në duart e një partie të vetme: a i shërben kapja e Gjykatës Kushtetuese interesit politik për t’iu shmangur kontrollit dhe llogaridhënies? Shqipëria në çekuilibër të plotë të mekanizmave të kontrollit dhe balancës, rrezikon kapjen totale të shtetit!”, shprehet kreu i shtetit.

Shfaq komentet
comments powered by Disqus
Sot mund të lexoni Shfletoni kopertinat