Dritan Nesho, drejtor i përgjithshëm i 'Harris x', nga Uashingtoni tregoi për gazetaren Ilva Tare në Euronews Albania se cilat janë etapat nëpër të cilat mund të shkojë zgjedhja e presidentit të ri të SHBA nëse vota e 3 nëntorit nuk përcakton një fitues.
Ai sqaroi se nisur nga gara shumë e ngushtë mes dy kandidatëve, procesi i zgjedhjes së presidentit të ri mund të zgjasë deri në janar, teksa do të duhet të kalojë në disa etapa procedurale.
“Gara shumë e ngushtë mes dy kandidatëve që do të përcaktohet nga disa shtete. Edhe nëse Trump humb, nuk është mohim i axhendës së Trump, mund të jetë mohim i tij si individ, si një aktor politik me frymë përçarëse, por 63 për qind e amerikanëve kanë votuar thjesht në bazë të politikave të Trump. Kemi të bëjmë me një fushë beteje shumë të hapur dhe besoj se kjo situatë do të vazhdojë për disa ditë.
Unë mendoj se Pensilvania do të jetë një varë e ngushtë, edhe Wiskonsin. Mund të ketë jetë një skenar si ai në vitin 2000, që të gjitha garat e ngushta shkojnë në rinumërim.
Trump është më shumë si një politikan shqiptar se si amerikan, nuk çedon kaq lehtë nga shifrat. Këtu ka një thyerje të një farë konsensusi të paktën nga Trump që doli dje dhe tha se mund të na kenë vjedhur votat. Kjo tregon se mund të ketë një proces që zgjat disa javë, mbase deri në fund të vitit", tha ai.
Nesho shpjegoi me detaje skenarin që e pret SHBA nëse zgjedhjet e 3 nëntorit nuk prodhojnë një fitues.
“Janë disa etapa, etapa e parë është votimi elektorëve në Kolegjin zgjedhor që ndodh një muaj pas zgjedhje, pra në fillim të dhjetorit.
Në qoftë se janë shtete që janë të papërcaktuara, atëherë ka dy rrugë. Një rrugë është që ke mundësinë e elektorëve të pabesë.
Pra, elektorët dalin dhe përcaktojnë një zgjedhës kundër vullnetit të votës së popullit ose në bazë të mendimit të tyre.
Ka precedentë të hershëm në shekullin e 19, në ato faza kur demokracia amerikane dhe precedentët politikë dhe ligjorë që përdoren sot ishin duke u përcaktuar
Etapa e dytë, nëse nuk ka një vendim nga elektorët, është në fillim të janarit, kur Kongresi Amerikan dhe specifikisht dhoma e ulët mblidhet të numërojë votën e elektorëve.
Nëse elektorët nuk e përcaktojnë dot një president, atëherë dhoma e ulët e përcakton presidentin në bazë të një votimi të shteteve.
Kjo do të thotë, që nëse një shtet ka 10 deputetë, 6 janë republikanë dhe 4 janë demokratë, atëherë ai shtet ja jep votën kandidatit republikan.
Pra nuk është në bazë thjesht të shifrave të deputetëve, është në bazë të shifrave të deputetëve brenda shteteve.
Dhe ke një etapë tjetër që nëse Senati nuk e pranon këtë votë, që pa diskutim dhoma e ulët është me demokratë dhe dhoma e lartë me republikanë, sepse është Kongresi i ri që e bën këtë votim, atëherë krijohet një komision i përbashkët dhe në këtë komision të përbashkët përcaktohet një fitues, ose sugjerohet një fitues.
Nëse sërish dhoma e ulët dhe e lartë nuk arrijnë një konsensus, atëherë vendimi i komisionit qëndron dhe zakonisht komisionet krijohen 5 me 5, nuk ka një votë ndarëse”, sqaroi Nesho.
