Gjykata e Posaçme e Apelit ka rikthyer në qeli ish-inspektorin e Tatimeve, Erjon Trungu, i akuzuar për ‘korrupsion’. Me kërkesë të SPAK, Apeli ndryshoi në ‘arrest në burg’ masën e ‘arrest në shtëpi’ të dhënë më herët për të nga Shkalla e Parë.
37-vjeçari Erion Trungu, me detyrë inspektor në hetimin tatimor në Drejtorinë e Përgjithshme, u arrestua në shtator 2020, pasi dyshohej se merrte para nga subjektet private, për të mos i hetuar kur i gjente në shkelje.
Në momentin e arrestimit iu gjetën me vete 5 mijë euro, të cilat i kishte marrë në formë rryshfeti nga një biznes në Kamëz.
Kush është Erion Trungu
Telashet për inspektorin Erion Trungun me bizneset kanë qenë të vazhdueshme. Në vitin 2015, bëhet me dije se Erion Trungu së bashku me kolegun e tij Arian Xheblati janë dhunuar për shkak të detyrës, pasi gjobitën një biznes në Tiranë.
Në atë kohë policia njoftonte se Fatmir Sulaj dhe Fredi Keta kanë goditur inspektorët e tatimeve Erion Trungu dhe Arian Xheblati, pasi kishin gjobitur biznesin sepse kasa fiskale nuk ishte funksionale.
Në këto kushte, biznesmenit iu vendos një gjobë, por vetë pronari nuk ishte prezent. Vetëm pak minuta më vënë, Sulaj i telefonon njërit prej 2 inspektorëve, duke i kërkuar një takim për të sqaruar nga afër punën e gjobës.
Së bashku me pronarin vjen edhe shoku i tij Fredi Keta, i cili kishte njohje me të 2 tatimorët. Vendi i takimit u caktua te stadiumit ‘Selman Stërmasi’, pranë një lokali. Biseda u acarua nga vetë pronari Sulaj, duke goditur dhe ofenduar inspektorët, ku këta të fundit bënë denoncimin në policinë e kryeqytetit. Njëri nga dy inspektorët mori edhe ndihmë mjekësore pas disa plagëve pa pasoja të rënda për shëndetin.
