Një mesazh kërcënues ka mbërritur në celularin e shefit të krimeve në komisariatin e Gramshit, Sokol Novaku, i cili kishte vetëm dhjetë ditë që ishte transferuar në këtë detyrë.
Mësohet se mesazhi kërcënues i ka mbërritur në telefonin që përdorte për punën. Persona të paidentifikuar e kanë kërcënuar në mënyrën me të keqe zyrtarin e policisë, duke i shkruar se ‘do ta djegin të gjallë, e do ta bëjnë ushqim për derra, bashkë me familjen’.
“..Do të bajm ushqim për derra, ty me gjithë familjen, do të djegim të gjallë. I ke ditët e numërume,”– shkruhet në mesazhin që ka marrë Sokol Novaku.
Pas këtij mesazhi kërcënues Novaku ka depozituar në Prokurorinë e Elbasanit kallëzim për kërcënimin e marrë. Hetimi ka nisur menjëherë për identifikimin e personave që kanë dërguar këtë kërcënim.
Novaku më parë ka mbajtur detyrën e shefit të sektorit të lëndëve narkotike në Elbasan, ndërsa më herët ka qenë edhe shef i komisariatit Nr.2 në Tiranë. Në drejtorinë e Policisë Elbasan Novaku u emërua shef i sektorit të narkotikëve ku qëndroi për 4 muaj.
