Gjatë konferencës së përbashkët për media krah Edi Ramës dhe Josep Borrell-it, Komisioneri i BE-së për Zgjerimin Olivér Várhelyi tha se me bërjen funksionale të gjykatave Shqipëria i ka përmbushur kriteret për Konferencën e Parë Ndërqeveritare, që do të varet tani nga shtetet anëtare të BE-së.
“Dua të përsëris edhe atë që është thënë në këtë vlerësim të përbashkët që në procesin e vettingut, meqënëse ai po ecën fuqishëm, me Gjykatën Kushtetuese, me Gjykatën e Lartë po ashtu tashmë kemi arritur pra aty ku duhet. Kështu që nga ana jonë vlerësimi që ne po u japim shteteve anëtare të BE-së është që gjithçka është përmbushur tashmë për Konferencën e Parë Ndërqeveritare, pra të gjitha kriteret”, tha Varhelyi.
Ky i fundit theksoi se procesi i integrimit bazohet mbi merita. “Ky proces bazohet te merita. Konstatimi ynë është që Shqipëria i ka përmbushur kushtet. Do jemi në kontakt me shtetet anëtarë që ata të bien dakord që kjo konferencë të bëhet sa më shpejt të jetë e mundur”, shtoi ai.
Më herët Borrell u shpreh se nuk ka ende një datë për Konferencën Ndërqeveritare, por shpreson se së shpejti do të jetë e mundur.
Në një linjë ishte edhe përfaqësuesi i lartë i Politikës së Jashtme në BE, Josep Borrell, i cili tha se: “Kemi shprehur dëshirën që kjo konferencë të ndodhë sa më shpejtë të jetë e mundur, deri më tani nuk kemi një datë të caktuar. Disa shtete anëtare janë të mendimit që duhet të avancohet më shumë para së të organizohet”.
