Gjykata Kushtetuese ka nisur të funksionojë, por ende nuk ka kuorumin e mjaftueshëm siç e përcakton ligji. Kjo gjykatë ka 6 anëtarë me mandat të plotë, ndërsa Vitore Tushës i ka mbarur mandati prej 3 vitesh. Ndërkohë ligji përcakton se Kushtetuesja duhet ketë 9 emra. Deri më tani janë zgjedhur emrat nga Kuvendi dhe Presidenca, ndërsa topi ka kaluar te Gjykata e Lartë. Kjo e fundit do të zgjedhë 3 emrat e fundit që do të plotësojnë kuorumin. Emërimet nga Kuvendi e Presidenca u kthyen në mollë sherri mes palëve. Presidenti arriti të fusë aty dy emra të besuar, ndërkohë që kishte më herët Vitore Tushën. Dy emrat që njihen si mbështetës të Metës janë Marsida Xhaferllari dhe Sonila Bejtja, ndërkohë Tusha u propozua nga Meta për në KLSH dhe mazhoranca e refuzoi. Sot që flasim 3 nga 7 anëtarë janë në krahun e presidentit dhe vendimmarrja për disa çështje duket se është disi e vështirë. Por pritet që shumë shpejt presidenti të humbasë forcën në Kushtetuese. Pyetja që shtrohet është se si do të ndodhë kjo? Vitore Tusha është pa mandat dhe në momentin që Gjykata e Lartë do të nisë plotësimin e 3 vakancave të fundit, ajo largohet nga funksioni. Pra nga 9 anëtarë që do të ketë Kushtetuesja, Meta do të ketë vetëm 2 njerëz të tij, numër i papërfillshëm duke qenë se janë 7 të tjerë që do vendosin për një çështje të caktuar. Vonesat për 3 emrat që vijnë nga Gjykata e Lartë duket se nuk do të zgjasin shumë pasi janë bërë lehtësira ligjore. Momentalisht duhet që Gjykata e Lartë të ketë 14 anëtarë në mënyrë që të mblidhet për të zgjedhur emrat që shkojnë në Kushtetuese mazhoranca ka dërguar një ligj në Kuvend, ku shprehet se vendimi quhet i ligjshëm edhe nëse mblidhet gjysma e anëtarëve të Gjykatës së Lartë, kjo gjykatë ka 19 anëtarë dhe me 10 emra ajo mund të marrë vendim. "Deri në emërimin e të paktën tre të katërtat e të gjithë gjyqtarëve të Gjykatës së Lartë, por në çdo rast, jo më vonë se data 31.12.2023, mbledhja e posaçme e gjyqtarëve të Gjykatës së Lartë, sipas pikës 3, të nenit 7 /9, të këtij ligji, është e vlefshme nëse marrin pjesë të paktën gjysma e të gjithë gjyqtarëve të Gjykatës së Lartë", thuhet në propozim.
Emërimet
Momentalisht Gjykata e Lartë ka vetëm 3 anëtarë, ndërkohë javën që lamë pas Këshilli i Lartë Gjyqësor i dërgoi presidentit 4 emra. Pra në total kjo gjykatë shumë shpejt do të shkojë në 7 anëtarë. Por gazeta ka mësuar se KLGJ ka në proces edhe emrat e 3 anëtarëve të tjerë dhe kjo do e çonte numrin në 10, aq sa nevojitet për të zgjedhur anëtarët e Kushtetueses. Pra duket se situata është zhbllokuar dhe në momentin që Gjykata e Lartë dërgon emrat e saj, presidenti del më i humburi.
Paditë e Metës
Në Kushtetuese janë 3 padi që kanë të bëjnë me presidentin. Padia e parë është bërë nga kryeministri, i cili kërkon të sqarohet nëse presidenti mund të bllokojë apo jo një emër që ka shkuar për ministër. Pra ka të bëjë me bllokimin e Gent Cakajt. Një tjetër padi që ka bërë Meta është ajo për shembjen e teatrit, ndërkohë që vendimtare është padia që ka shkuar nga shoqata e bashkive për zgjedhjet vendore 2019. Sa i takon padisë për zgjedhjet nuk ka ende një datë se kur do të shqyrtohet pasi duket se është një vendim shumë i fortë dhe me gjasë do të pritet plotësimi i gjykatës me 9 anëtarë. Ky vendim ka shumë rëndësi pasi nëse shumica është pro presidentit, atëherë vendi shkon në zgjedhje të reja vendore. Në prapaskenë po bëhet luftë e fortë mbi vendimet e gjykatës, por mbetet të shihet. Ajo që vihet re është se brenda pak muajsh dominimi i Metës në Kushtetuese do të eliminohet.
