Kreu i Partisë Demokratike, Lulzim Basha në një takim me strukturat në Durrës ka theksuar edhe një herë se PD nuk do ta pranojë rezultatin e zgjedhjeve të 25 prillit, sepse zgjedhjet i konsideron ‘masakër elektorale’.
Basha tha se demokratët nuk do të dorëzohen kurrë dhe beteja deri në përmbysjen e regjimit Rama-Doshi do të vazhdojë.
“Demokratët nuk dorëzohen kurrë. Ne jemi e e vetmja digë që e ndan të mirën nga e keqja, dëshpërimin nga shpresa. ne jemi nisur për t’i çuar shqiptarët drejtë një të ardhme më të mirë. Në 25 prill vullneti i zgjedhjeve u tjetërsua.
Ky rezultat nuk do të pranohet kurrë, e qartë si ky diel që shndrit. Dhe për kë mendon se 25 prilli është mbarimi i betejës sonë e ka gabim. Beteja jonë do të vazhdojë deri në përmbysjen e regjimit Rama-Doshi.
Ata që na bëjnë me faj, ju them se për PD opsioni i bashkëpunimit me krimin do të jetë zero. Pushteti i marrë me krimin pjell vetëm krim. Ne nuk e kërkuam pushtetin për vetën tonë, ne e dorëzuam për t’u bërë njësh me qytetarët.
Pushteti për ne nuk është një mjet për të vjedhur dhe blerë votat, por një mjet për të përmirësuar jetën e qytetarëve. Ne jemi një shtëpi e madhe dhe çdo kush ka të mirat dhe të metat e tij/saj, por një gjë na bashkon vendosmëria për t’iu shërbyer këtyre njerëzve.
Mendimet dhe idetë, kritikat konstruktive ne i mirëpresim, por duhet të vazhdojmë betejën që në 25 prill menduan se e mbyllën. Në 25 prill ata mbyllën vetëm një mundësi për ndryshimin që do të sillte vota plebishitare e qytetarëve”, tha Basha.
