Kandidat për kryetar, Kadilli mesazh demokratëve: Të ofrojmë një qasje të re në PD

Shqipëria

Kandidat për kryetar, Kadilli mesazh demokratëve: Të ofrojmë një qasje të re në PD

Më: 12 maj 2021 Në ora: 14:35
Anëtari i Kryesisë së Partisë Demokratike, Fatbardh Kadilli

Anëtari i Kryesisë së Partisë Demokratike, Fatbardh Kadilli, i cili ka shpallur kandidaturën për kryetar u është drejtuar demokratëve me një video-mesazh.

Ndër të tjera ai thotë se hynë në zgjedhje me shpresë dhe fajëson sërish lidershipin e partisë dhe mungesën e ekipeve në terren.

Kadilli thekson më tej se ndryshimin e kundërshtarit e bëjmë duke ndryshuar së pari vetë, duke propozuar qasje të re dhe projekt të ri për PD-në.

Mesazhi i plotë:

Demokratë dhe mbështetës të PD, më e keqja ndodhi. Një kundërshtar diabolik u rikonfirmua në qeveri. Ne demokratët e shohim veten përsëri në opozitë. Hymë në këto zgjedhje me shpresë, por bashkë me shpresën nxirrte kokë dhe dyshimi se nuk ishte bërë sa duhet.

Cili demokrat nuk u shqetësua deri në lodhje nga vonesat e lidershipit, nga mungesa e ekipeve politike në terren? Cili demokrat nuk u lodh deri në rraskapitje nga paqartësitë e lidershipit? Nga mungesa e informacionit për çdo vendim të rëndësishëm?

Cili demokrat nuk u rraskapit deri në stërmundim pse nuk u mobilizuan gjithë energjitë, gjithë faktorët dhe gjithë individët që mund të sillnin ndryshimin? Të gjitha dyshimet tona, që i ngritëm me ndershmëri mes nesh, nga anëtari më i thjeshtë, te drejtuesit e degëve e deri në qendër, janë sot pasqyra ku shohim fytyrën e humbjes. Të gjitha mëdyshjet dhe shqetësimet që i ngritëm liderit, me besnikëri, që të na dëgjohej zëri, ranë në një vesh shurdhër. Ato janë sot, kjo e sotme pa të ardhme të qartë.

Kundërshtari është ai që është: një dhe i pandryshueshëm. Por, nuk është koha për t’u fshehur pas diabolizmave, hileve dhe arrogancës së tij. Ai ashtu është dhe ashtu do të jetë përsëri. Edhe në përballjen e radhës edhe në zgjedhjet e tjera, ndryshimin e kundërshtarit e bëjmë duke ndryshuar së pari vetë. Duke bërë pyetjen: a duhet të ndryshojmë diçka apo të vazhdojmë kështu se jemi mirë? Është koha të jemi të vërtetë me veten si demokratë. Të ofrojmë një qasje të re. Një projekt të ri politik për Partinë Demokratike. Një opozitë të re. Për të gjithë. Me të gjithë. Gjithkund dhe gjithherë. • #PartiaDemokratike #PD #FatbardhKadilli #Shqiperia #Zgjedhje #ProjektiShpreses #Albania #election

commentFirst article
Sot mund të lexoni Shfletoni kopertinat