Me anë të një postimi në Facebook, ministri i Brendshëm, Bledi Çuçi e ka cilësuar si një sukses kundër trafikut të drogës kapjen e 400 kg kokainë në Kosovës, sasi që kishte kaluar nga Brazili, në Itali drejt Portit të Durrësit dhe përfunduar në Lipjan të Kosovës.
Çuçi shkruan se hetimi profesional mes disa shteteve çoi në shkatërrimin e një rrjeti të fuqishëm narkotikësh. Sipas tij kjo lufta me trafikun e drogës është e vazhdueshme dhe do të pasohet nga operacione të tjera dhe goditje si kjo e fundit.
“Goditja e kontrolluar e grupit kriminal që tentoi të trafikonte rreth 400 kg lëndë narkotike e llojit kokainë në Kosovë, është një tjetër dëshmi e suksesit të luftës së përbashkët kundër trafikut të drogës dhe provë e besimit të lartë të partnerëve te Policia e Shtetit.
Hetimi profesional dhe intensiv mes disa shteteve na çoi në shkatërrimin e një rrjeti të fuqishëm në fushën e narkotikëve. Kjo është një luftë e vazhdueshme, që do të pasohet nga operacione të tjera dhe goditje si kjo e fundit, për ta bërë Shqipërinë dhe rajonin një vend më të sigurt”, shkruan Çuçi.
