Ditën e premte, publiku u trondit nga një ngjarje e rëndë! Një tjetër grua humbi jetën, pasi u qëllua për vdekje nga ish-bashkëshorti i saj.
Është fjala për vrasjen e Sabrina Bengas, e cila u ekzekutua nga 31-vjeçari, Elton Metaj. Nëna e një vajze të mitur u përcoll për në banesën e fundit, ndërsa policia ka bërë të mundur arrestimin e autorit të krimit.
Ngjarja e rëndë ndodhi në fshatin Zhupan, ku Metaj kishte shkuar në banesën e prindërve të saj dhe e qëlloi kur po darkonte. Ai njihej si person problematik.
Babai i Elton Metës ka thënë për emisionin “Shqipëria Live” se vrasja ka ndodhur në ditën e lindjes së 31-vjeçarit. Madje ai ka treguar se Sabrina i kishte thënë Eltonit se e donte.
“Mos i ndodhtë askujt kjo që më ndodhi mua. Ajo nuk ishte vetëm nusja e shtëpisë, por edhe vajza jonë. E rritëm vetë, e morëm 15 vjeçe. Na ka lënë një dhembshuri të madhe në zemër, këtë zi nuk e ka vetëm familja e saj, por edhe ne.
Nuk kisha mundësi ekonomike të nxirrja djalin nga burgu. Eltoni ishte mirë në shtëpi. Veprimin e bëri në ditën e lindjes. E bëri nga ngarkesa e pijes alkoolike. Kishte një presion nga ana e familjes së saj. Sabrina e donte. I thoshte le të ikë babi në Itali, e do ta rregullojmë muhabetin”, tha babai i 31-vjeçarit.
I pyetur nëse kanë frikë nga marrja e gjakut, i ati i Eltonit tha: “Gjaknxehtësia është, ka një far të drejte tjetri që të marrë hak”.
Ndërsa duke folur për bisedën që ka pasur me Eltonin pas ngjarjes së rëndë, ai tha: “Babi e bëra këtë veprim, u bëfsh lëmsh, mos e sjell kokën. Më ka ikur edhe djali, edhe Sabina nga jeta”.
