Kryeministri Edi Rama dhe ministrat e kabinetit të ri janë mbledhur tashmë në Velipojë, në takimin e dytë informal pas atij të disa javëve më parë në Llogara.
Kryebashkiakja e Shkodrës, demokratja Voltana Ademi, pavarësisht përplasjeve të shumta që ka patur me kryeministrin, i ka shprehur këtij të fundit urimet e saj për organizimin e mbledhjes së dytë informale të qeverisë në territorin e bashkisë së Shkodrës.
Por nga ana tjetër, Ademi ka “përfituar” nga rasti për t’i kujtuar kreut të qeverisë një listë të gjatë detyrimesh ndaj Shkodrës.
Për më tepër lexoni mesazhin e Voltana Ademit:
REAGIMI I BASHKISË SHKODER
Bashkia Shkodër dhe Kryetarja Znj. Voltana Ademi përshëndesin organizimin e mbledhjes së radhës së qeverisë së re shqiptare në territorin e Bashkisë Shkodër: suksese në ushtrimin e mandatit tuaj në funksion e shërbim të qytetarëve!
Me këtë rast, dëshirojmë të sjellim në vëmendjen dhe prioritetet e kësaj qeverie disa nga projektet më madhore të Planit të Përgjithshëm Vendor (PPV), hartuar më pjesëmarrjen e gjerë të komunitetit të Shkodrës.
• Rivitalizimi i Hyrjes së Shkodrës (perimetri Bërdicë-Shkodër)
• Përmirësimi mobiliteti dhe aksesit ndërkufitar (Aksi Rrugor Shirokë- Zogaj përfshi pikën doganore);
• Mbyllja e unazës dhe zhvillimi i turizimit të integruar malor (Kompletimi i Unazës Shkodër-Shalë-Theth-Bogë-Koplik);
• By-Pass Lindor i Qytetit Shkodër;
• Muzeu i artit pamor “Lin Delija”;
• Rikualifikim i i ballinës Ujore buzë Liqenit të Shkodrës;
• Urbanizimi i Plazhit të Velipojës dhe zonave informale Mark Lula, Kiras, Rrethina;
• Qendra e Trajtimit të Ujërave të Zeza Shkodër.
Bashkia dhe Kryetarja Ademi urojnë vërtetë që qeveria e re ta ketë seriozisht dhe gjithnjë në prioritetet e saj, ashtu si në këtë mbledhje të parë, territorin e Bashkisë Shkodër.
Presim që ky takim i qeverisë të ushqejë një tryezë dialogu mes pushtetit vendor dhe qëndror për materializimin e projekteve të propozuara për Shkodrën, duke i garantuar nga ana tjetër, bashkëpunim dhe mirëkuptim të ndersjelltë.