Lirohet nga burgu grek biznesmeni shqiptar që “trazoi” politikën

Shqipëria

Lirohet nga burgu grek biznesmeni shqiptar që “trazoi” politikën

Më: 22 gusht 2018 Në ora: 13:13
Edmond Bego

Pas 4 ditësh autoritetet greke lirojnë nga burgu Edmond Begon, ish-i dënuar për trafik droge, i akuzuar nga Italia për pjesëmarrje në organizatë kriminale.

Bego, pronar i disa bizneseve në Shqipëri u arrestua më 18 gusht në Greqi, për llogari të drejtësisë italiane, pasi ishte dënuar në vendin fqinj për trafik të lëndëve narkotike në vitin 2008 me 21 vite burg.

Ai mbahej në paraburgim në Korfuz, që nga momenti i ndalimit, ndërkohë që kishte deklaruar gjatë arrestimit nga policia greke se i kishte shlyer detyrimet e tij me drejtësinë dhe se po e arrestonin padrejtësisht.

Biznesmeni u lirua pas përgjigjes që pritej nga Interpol Roma drejt Interpol Athinës ku thuhej se ndaj Begos nuk ka asnjë çështje dënimi të hapur.

Arrestimi i tij hapi një luftë politike mes kampeve politike në Shqipëri. Opozita akuzoi qeverinë dhe kreun e grupit parlamentar të LSI-së Taulant Balla se i kishte siguruar mbrojtje dhe se kishte lidhje me të. Nga ana tjetër maxhoranca dhe vetë Balla, i cili pranoi se e njihte familjarisht, mohuan se i kishin siguruar mbrojtje biznesmenit që vuajti 4 vjet burg në Shqipëri për akuzat e ngritura nga shteti italian.

Balla paralajmëroi se edhe ky blof i PD-së do të përfundonte si rasti Babale.

DËNIMI NË SHQIPËRI

Gjykata e Lartë ia konvertoi dënimin Edmond Begës nga 21 vite burg që e kishte dënuar drejtësia italiane, në 4 vite e 4 muaj, me një vendim të datës 15 shtator 2010.

Objekti i kërkesës së bërë nga Prokuroria në atë kohë ishte njohja e vendimit penal italian të formës së prerë nr.1735, datë 22.04.2008 të Gjykatës së Apelit Torino, Seksioni i Parë Penal, Itali, për të dënuarin Edmond Bego (alias Manoli Bega), për veprat penale të parashikuara nga ligji italian; “Prodhim dhe trafik i paligjshëm i lëndëve narkotike apo psikotrope”, si dhe “Organizatë që ka për qëllim trafikimin e paligjshëm të lëndëve narkotike apo psikotrope”, të cilat parashikohen si vepra penale “Trafikimi i narkotikëve”, “Organizimi dhe drejtimi i organizatave kriminale”, të Kodit Penal të Republikës së Shqipërisë.

Gjykata e Shkallës së Parë Tiranë, me vendimin e datës 12.03.2010 kishte njohur vendimin penal italian, duke e dënuar Edmond Begon me 7 vjet burgim. Si arsyetim për uljen e këtij dënimi ishte ligji italian nr.241/2006, për Amnistinë e Përgjithshme, si dhe neneve 174 të K.Penal Italian dhe 672 të K.Pr.Penale italiane, sipas të cilave ai kishte përfituar një ulje dënimi prej tre vjet burgim.

Edhe Gjykata e Apelit Tiranë, me vendimin e datës 02.06.2010, kishte lënë në fuqi të njëjtin vendim. Ndërsa Gjykata e Lartë arsyetoi disi më ndryshe. “Nga aktet e dosjes gjyqësore rezulton se Gjykatat e faktit kanë pranuar të provuar se me vendimin të Gjykatës së Torinos, ndërmjet të tjerash, shtetasi shqiptar Edmond Bego (Manoli Bega) është dënuar me 27 vjet e tetë muaj burgim.

Në aplikim të nenit 442 të K.Pr.Penale italiane (që i korrespondon neni 406 i K.Pr.Penale të Republikës së Shqipërisë për gjykimin e shkurtuar), ai është dënuar përfundimisht me 18 vjet, 5 muaj e 10 ditë burgim. Kundër këtij vendimi është bërë ankim në Gjykatën e Apelit, Torino, Itali ku ai është dënuar me 21 vjet burgim.

I është ulur 1/3 e dënimit dhe është dënuar përfundimisht me 14 vjet burgim”, thuhet në vendimin e Gjykatës. Duke marrë parasysh edhe vendimin maksimal të legjislacionit shqiptar për këto vepra penale, Bego duhej të dënohej me 11 vjet burg. Por me të gjitha uljet e mundshme, dënimi arriti në 4 vjet e 4 muaj.

Sot mund të lexoni Shfletoni kopertinat