Synimi ynë dhe ambicia ime është që “Air Albania” të mund t’i çojë shqiptarët sa më larg dhe ndërkohë t’i ndërlidhë ata sa më shumë, deklaroi sonte kryeministri i Shqipërisë, Edi Rama, në ceremoninë e inaugurimit të Kompanisë shqiptare “Air Albania”.
Kryeministri Rama e konsideroi një emocion tejet të veçantë, ndërsa theksoi se sot po përmbushin një zotim dhënë bashkëqytetarëve.
“Sot përmbushim një ëndërr të kahershme, që dukej e pamundur për vite e vite të tëra, kompaninë ajrore të flamurit kuqezi ‘Air Albania”, tha Rama dhe shtoi se “Air Albania” është krenaria e madhe kombëtare. Sipas tij, “kjo është një ëndërr që sot merr krahë për të filluar një fluturim, që do të jetë i gjatë dhe jo i lehtë”.