Jo më larg se dy muaj më parë, Komisioni i Pavarur i Kualifikimit u kthye në “aurën” e gjithë vëmendjes politike e me gjerë. Çdo ditë, anëtarët e KPK-së kaluan në sitë jo pak por gjithë trupën gjykuese të Gjykatës Kushtetuese e asaj të Lartë.
Me një shpejtësi rekord, KPK-ja mori vendimin për secilin prej tyre. Si pasojë e këtij procesi, gjykata Kushtetuese nuk funksionon më dhe as ajo e Lartë.
E vetmja gjë që ndodh në zyrat e këtyre dy institucioneve janë ankesat deng që vijnë nga qytetarët. Dosjet shtohen, por puna ka ngecur. Kjo panoramë nuk vlen për disa vendime të diskutueshme të qeverisë, që derën e fundit tanime kanë vetëm Presidentin e Republikës.
Organet e reja të drejtësisë as duken në horizont
Paralelisht Komisioni i Pavarur i Kualifikimi mori pushimet për t’u rikthyer në shtator. Por jo, mbledhja e parë e saj njoftohet se do të fillojë më 3 tetor për të zhvilluar seancën dëgjimore me gjyqtarin e gjykatës administrative në Shkodër, Ahmet Jangulli.
Gjyqtari Ahmet Jangulli është njëkohësisht edhe anëtar i Këshillit të Emërimeve në Drejtësi. Trupi gjykues i KPK do përbëhet nga Brunilda Bekteshi, Suela Zhegu, Valbona Sanxhaktari.
Gjyqtari i Administratives do t’i nënshtrohet vetingut për tre komponentë kryesorë siç janë pasuria, kriteri moral dhe aftësitë profesionale. Gjithçka rifillon. Me ritme aspak të shpejta…
