Ish-gjenerali Xhemal Gjunkshi, sot anëtari i Parlamentit si deputeti i PD, i ka bërë thirrje presidentit Meta që të mbledhë urgjentisht Këshillin e Sigurisë Kombëtare pas ngjarjes të së enjtes mbrëma në një prej zonave më të frekuentuara të kryeqytetit.
“Si deputet i Kuvendit të Shqipërisë, si Anëtar i Komisionit të Sigurisë Kombëtare i bëj thirrje Presidentit të Republikës që të mbledhë urgjentisht Këshillin e Sigurisë Kombëtare”, shkruan ai në një postim në rrjetin social Facebook.
Një person ka humbur jetën dhe dy të tjerë kanë mbetur të plagosur mbrëmjen e kaluar në zonën e ish-Bllokut.
Personi që ka humbur jetën është Rigers Gaxha, i cili nga informacionet dyshohet se punonte si truprojë i shtetasit Ervis Martini, që ka mbetur i plagosur në këtë ngjarje. I plagosur ka mbetur edhe Laert Hasa.
Ndërkohë që policia përmes një komunikate për media ka bërë me dije se ka arrestuar dy të plagosurit, si dhe ka shpallur në kërkim 3 të tjerë.
