Familjarët e autorit të masakrës në Mat largohen, frikë për hakmarrje të mundshme

Shqipëria

Familjarët e autorit të masakrës në Mat largohen, frikë për hakmarrje të mundshme

Më: 15 tetor 2018 Në ora: 19:33
I arrestuari

Këtë të hënë gjykata vendosi ta lërë në burg autorin e masakrës në Mat, ndërsa familjarët e Kujtim Koxhës janë larguar nga fshati Shëlli.

Të afërmit e autorit të 3 vrasjeve kanë frikë se mund të vriten për shkak të ndonjë hakmarrje të mundshme nga familjarët e viktimave, dy punënjësit e Bashkisë së Matit Erzen Aliaj e Mentor Hoxha, e sidomos nga familjarët e bashkëfshatarit të vrarë, Hamit Buçit.

I braktisur nga famija dhe pa avokat mbrojtës, Kujtim Koxha, autori i krimit të trefishtë në fshatin Shëlli të Matit, doli sot përpara Gjykatës për masën e sigurisë.

Gjatë dëshmisë së tij në polici,. 51-vjeçari pranoi autorësinë e krimit, por nuk është penduar për tre viktimat që shkaktoi, dy nga të cilët punonjës të Bashkisë, Erzen Aliaj dhe Mentor Hoxha, dhe bashkëfshatarin e tij, Hamit Buçi, ndërsa mbeti i plagosur Astrit Hani, i cili ndodhet në spitalin e Burrelit.

Ai është shprehur se debatoi fillimisht me viktimat, ndërsa njëri prej tyre, Erzen Aliaj e ka goditur me një shpullë, teksa ndodheshin në lokalin e fshatit.

Në gjendje të dehur, 51-vjeçari ka dalë nga lokali dhe është kthyer më pas me një armë zjarri kallashnikov, karikatorin e të cilit e zbrazi mbi tre viktimat.

Ngjarja mund të kishte bilanc edhe më tragjik, nëse Kujtim Koxhës nuk do i ishte marrë arma nga dora.

Përpara policisë ai tha se ishte ndjerë i fyer nga goditja me shuplakë në sy të bashkëfshatarëve të tij dhe për këtë shkak ndërmori aktin makabër.

Në vendin e ngjarjes autoritetet gjetën 11 gëzhoja. Për ironi të fatit, më herët në lokal kishte qenë babai i një prej viktimave, Mentor Hoxhës, i cili e kishte qerasur me raki autorin e masakrës, Kujtim Koxha.

commentFirst article
Sot mund të lexoni Shfletoni kopertinat