Tri rastet kur Ilir Meta tallet me Lulzim Bashën

Shqipëria

Tri rastet kur Ilir Meta tallet me Lulzim Bashën

Më: 19 nëntor 2018 Në ora: 07:19
Presidenti i Republikës, Ilir Meta dhe Lulzim Basha

Presidenti i Republikës, Ilir Meta, i cili drejton në fakt edhe LSI-në në hije, është njeriu i cili po tallet keqazi me kryetarin e PD-së, Lulzim Basha dhe këtë e ka bërë në të paktën tre raste të verifikuara.

Së pari, gjithçka filloi në vitin 2013, atëherë kur Ilir Meta e kishte mbyllur marrëveshjen me Ramën, pas një darke me ngjala në Gjirin e Lalëzit. Dhe Lulzim Basha shkonte te Sali Berisha dhe i jepte garanci të plota se Ilir Meta nuk do të ikte. Gjithçka ndodhte para 1 prillit të 2013-ës, kur Ilir Meta braktisi Berishën dhe shkoi në koalicion publikisht dhe zyrtarisht me Edi Ramën.

Muaj të tërë gënjeshtrash që Lulzim Basha i raportonte tek Berisha, duke i thënë se Ilir Meta nuk do të ikte nga PD-ja dhe se maksimumi do të dilte më vete, duke i shkaktuar kështu një tjetër humbje të majtës.

Rasti i dytë është ai i vitit 2017, pra përpara zgjedhjeve. Sa herë ka zgjedhje, Ilir Meta i fut një tallava dhe tallje me Lulzim Bashën, duke e nxjerrë një klloun politik.

Kur Lulzim Basha ishte në çadër bërtiste dhe shpresonte që LSI-ja ta braktiste qeverinë. Në atë kohë ai publikisht edhe nga çadra e ftoi Ilir Metën të dilte në opozitë, të bashkohej me Bashën dhe të shkojë në çadër. Ilir Meta lart e poshtë e gënjente. Çonte edhe bashkëpunëtorët dhe gënjeshtarët që i vinë vërdallë atij, por që i pëlqen ti ketë afër për të çuar “selam” tek Luli. Atëherë, pra rreth një vit e gjysëm më parë, u krijua bindja se Ilir Meta do të dilte nga koalicioni me Ramën, do të dorëzonte detyrën e kreut të Kuvendit dhe do të kalonte me Lulzim Bashën, por kjo nuk ndodhi, me gjithë shpresat që pati Lulzimi, gjithçka që panë shqiptarët dhe e provuan ishte e kundërta.

Ilir Meta jo vetëm që nuk iku, por e braktisi Lulzim Bashën. Doli i vetëm në zgjedhje, fitoi më shumë mandate dhe përpara se të zhvilloheshin zgjedhjet u bë President i Republikës së Shqipërisë, me votat e Edi Ramës. Megjithëse disa muaj më parë, Lulzimi kishte shpresuar se Ilir Meta do të ikte nga qeveria, duke tentuar të bënte zgjedhje me LSI-në në krah, dështoi. Ilir Meta e gënjeu.

Luli, për t’u hakmarrë më pas ndaj LSI-së, në marrëveshje me Edi Ramën e sulmoi atë egërsisht. Ç’ka i tregoi edhe një herë Ilir Metës se kush ishte Lulzim Basha dhe kush ishte qëllimi i tij i vërtetë në politikë. Pra, LSI-në e donte për interesat e tij personale. Ndërsa Ilir Meta si “ujk i vjetër” në politikë, kërkonte që të luante me Lulzim Bashën për të qënë vetë në pushtet. E kështu ndodhi.

Në zgjedhjet e 2013-ës, Lulzim Basha humbi turpësisht përballë Edi Ramës dhe në rast se PD nga 58 mandate shkoi në 45, Ilir Meta shkoi në 19 mandate deputetësh, duke u rritur. Edhe PS-ja gjithashtu u rrit. E vetmja forcë politike që pësoi humbje në zgjedhje, ishte Partia Demokratike e Lulzim Bashës, e cila kishte ngrënë shkelmin e dytë nga “tradhëtia” e Ilir Metës.

E treta, e provuar tashmë është ajo e 10 ditëve të fundit. Ilir Meta nuk dekretoi në afat Sandër Lleshin për ministër të Brendshëm, ç’ka ngriti pritshmëritë e Lulzim Bashës, i cili në publik e mbështeti mosdekretimin, duke thënë se ishte një vendim i drejtë e presidentit dhe e përshëndeste si akt politik. Të gjithë pritshmëritë, jo vetëm të Lulzimit, por edhe të eksponentëve të tjerë politik në PD, të cilët duken të jenë “pionerë” apo “fëmijë” në këtë rol, u gëzuan. Shkruanin postime në rrjetet sociale dhe bënin deklarata publike, në mbështetje të presidentit, i cili po frenonte Edi Ramën dhe qeverinë e tij të krimit.

Por, sërish Meta ashtu si dy herët e para, e “gënjeu” dhe e tradhëtoi publikisht Lulzim Bashën. Ai dje në mbrëmje dekretoi Sandër Lleshin, pasi gjeti një lojë.

Përtej mosbindjes së tij, pra faktit se ai nuk ishte i bindur nëse Sandër Lleshi duhej apo jo të merrte detyrën e ministrit të Brendshëm, dje e dekretoi pasi u bind dhe si lojë gjeti gjoja gradën e Gjeneralit. Përtej kësaj nga mosbindja në dekretim, ka një diferencë, e cila fillon me Lulzim Bashën që u gënjye dhe me Sandër Lleshin që hyri në zyrë si ministër i Brendshëm.

Pra, janë tre rastet kur Ilir Meta të paktën publikisht dhe me aktet e tij politike, është tallur keqazi me Lulin duke e lënë “me gisht në gojë”. Edhe në 2013-ën, kur e gënjente se nuk do të ikte me Edi Ramën, edhe në 2017-ën kur e gënjente se do t’i shkontë në çadër, edhe në 2018 kur e “gënjeu” se nuk do ta dekretonte Sandër Lleshin.

Por, Luli nuk e ka problem. Ai pranon të gënjehet nga Ilir Meta dhe LSI-ja, sepse edhe vetë është içik gënjeshtar. Gënjen dhe e gënjejnë. Lulzim Bashës i pëlqen që Ilir Meta ta gënjejë, e beson se LSI-ja do t’i rrijë në krah, por kjo nuk ka për të ndodhur më kurrë. LSI-ja ka interesat e saj politike, të lidhura fort me Ilir Metën dhe qëllime të qarta politike, që nuk kanë asnjë lidhje me rrugën e Lulzim Bashës. Por, me pragmatizmin e tyre dhe me pushtetin që lidhet direkt pas një karrigeje të zotit Meta dhe benefitet që ka çeta e tij nga pas, që e ka emrin LSI.(CNA.al)

commentFirst article
Sot mund të lexoni Shfletoni kopertinat