Edhe në Shkozë protestohet kundër prishjes së objekteve për ndërtimin e Unazës së Madhe

Shqipëria

Edhe në Shkozë protestohet kundër prishjes së objekteve për ndërtimin e Unazës së Madhe

Më: 3 dhjetor 2018 Në ora: 12:53
Shkozë

Ka nisur sot në Shkozë aksioni i IKMT-së për prishjen e objekteve, në kuadër të ndërtimit të Unazës së Madhe. Mirëpo, banorët e Shkozës kanë dalë ditën e sotme në protestë për të kundërshtuar shembjen e tyre.

Banorët pretendojnë se nuk kanë marrë asnjë dokument apo njoftim paraprak për prishjen e objekteve.

“Tek ne vijnë pa asnjë njoftim për të prishur shtëpinë. Këta duhet të na kishin sjellë në mënyrë zyrtare letrat për prishjen e objekteve. Ne kërkojmë që të spostohet, sepse gjynah të prishen këto shtëpi.

Projekti ka ndryshuar disa herë. Ne nuk duam konfrontim me asnjë. Pse duan të na bëjnë të keq pa qenë. Ne duam shpronësim, ose devijim të projektit”, tregon njëri prej banorëve. Më tej ai rrëfen se kjo situatë po prek edhe gjendjen emocionale dhe psikologjike të fëmijëve.

“Tre jetimë i kam, do ia lë Edi Ramës amanet, nëse mund t’i mbajë. Kam dhe dy invalidë. Kam dhe motrën e sëmurë.

Ta dish sa janë traumatizuar kalamajtë. Një dëm psikologjik sa nuk e ke idenë. Por a ka fëmijë ai?! Nëse ke fëmijë, mendo si për fëmijën tënd, mos mendo për ne se jemi të rritur. Është katastrofë”, shprehet banori.

Sot mund të lexoni Shfletoni kopertinat